Сумар дня на 20. мая 2024 р.

Приносиме вам сумар медияльной ґрупы ЛЕМ.фм+ на ден 20. мая 2024 р.

Русиньскє Нацийональне Свято на Мадярах

В найблизшу суботу, 25. мая, своє свято будут празднувати Русины на Мадярах. Того рока Русиньскє Нацийональне Свято, котрого головным орґанізатором єст Вседержавне русиньскє самосправуваня, одбуде ся в Дебрецині. Подію одкрыє предсідатель орґанізациі Віктор Крамаренко. Участных поздоровит і Ласло Повшан, предсідатель Культурной комісиі Парляменту Мадяр. На русиньскым святі традицийно одбуде ся передаваня Преміі Антония Годинкы. Торжество буде продолжало концертом віолончелисты Андраша Зана і молитвом параклису, котрый одслужыт Высокопреосвященый владыка Филип Кочіш, архієпископ і митрополита гайдудорожскій. Покровителями тогорічного русиньского свята сут Мікловш Шолтес – державный секретар з вопросів реліґійных і нацийоналных капчань, Ласло Повшан – предсідатель Культурной комісиі Парляменту Мадяр, і Віра Ґіріц – посланкыня мадярского парляменту за Русинів.

Днес одкрытя Русиньского Фестівалю

Днес початок 12. річника Фестівалю Культуры Русиинів Словациі в Свиднику – Русиньского Фестівалю, котрого головным орґанізатором єст Окресна Орґанізация Русиньской Оброды в Свиднику. На днес заплянуване єст торжественне одкрытя фестівалю, заран в Домі Культуры запрезентує ся русиньскій Театр Александра Духновича з Пряшова з пєсом ”Сіль над золото”. В середу в Піддуклянскій Книжници буде мож выслухати выкладу од Інституту Русиньского Языка і Культуры Пряшівского Університету, а в четвер одбуде ся 9. едиция Фестівалю Віры. Од пятниці до неділі в свидницкым амфітеатрі буде проходила головна, концертова част фестівалю.

Науковый выклад в Рускій Бурсі – о Акциі «Вісла» і постанові ІНП

Уж в тым тыжни, в пятницю 24. мая, в Рускій Бурсі в Ґорлицях буде мож выслухати выклад пн. «Постанова о ремісиі слідства в справі акциі «Вісла» – чом не мож згодити ся з єй змістом?», котрый выголосит др габ. Ян Пісуліньскій, професор Ряшівского Універистету, автор моноґрафіі «Акция специяльна ”Вісла”». Выклад буде выголошеный в польскым языку. Початок о 18.00 год. Припомнийме, што піл рока тому Інститут Нацийональной Памяти (Instytut Pamięci Narodowej) ствердил, што, парафразуючы – не было ничым злым, же Лемкы і Украінці досвідчыли акциі «Вісла». Не было і неє згоды на такы стверджыня. Неє згоды на фальшуваня істориі. Професор Ян Пісуліньскій пояснит – чом?

Лыжный вытяг в Щавнику уж в тым сезоні

Ґміна Мушына хоче одкрыти лыжный вытяг в Щавнику іщы в тым році. Вытяг мают побудувати Польскы Кабельны Желізниці. Як подал бургомайстер Мушыны Ян Ґольба, на місци тырвают уж порядкуючы працы і рыхтуючы до зачатя головных робіт. За бургомайстром, кєд реально не буде зо страны інституций выдаючых позволіня ниякых проблемів, то быти може тота част буде зреализувана іщы на тот сезон. Кєд не поведе ся зреализувати інвестициі до той зимы, то вытяг мал бы быти одкрытый в сезоні 2025/2026. Вытяг в Щавнику має войти в склад великого лыжного комплексу, котрого інвестором сут Польскы Кабельны Желізниці. Має він в будучности получыти Верхомлю з Креницком Яворином.

Утрудніня в руху в Польковицях

Ґміна Польковиці інформує о утруднінях в руху, головно для пішых. До пятниці 25. мая на скрижуваню улиц Домбровского і Губаля та ронда Нєзапомінайкі буде ведена інсталяция переходів для пішых. На переходах будут інсталюваны елементы з остерігаючыма выпустками. Підвысшат они увагу пішых участників руху, особливо невидячых і планно видячых.