Сумар дня на 20. серпня/авґуста 2021 р.

Приносиме вам сумар медияльной ґрупы ЛЕМ.фм+ на ден 20. серпня/авґуста 2021 р.

В словацкій охороні здоровля бракує інформаций в меншыновых языках

Як подали на офіцийным сайті полномічного влады Словацкой Республикы про нацийональны меншыны, Ласло Буковскій стрітил ся в віторок, 17. серпня/авґуста, з міністром здравля Владиміром Ленґварскым. Уряд полномічного видит в обшыри охоровы здоровля великы недостаткы – бракує означынь, інформаций і написів для пациєнтів в меншыновых языках. Має то выникати головно з браку знаємости обовязків, якы выходят з меншынового языкового закону. На стрічы Ленґварскій обіцял інтенсивну спілпрацу Міністерства Здравля з урядом полномічного при вакцинацийній кампаніі в меншыновых языках. В будучых місяцях буде зрыхтувана і зміна леґіслятивы та інструкция просаджыня меншыновых языковых прав в реґіональным здравотництві. Як повіл Буковскій, старат ся, жебы літера закону, котра бесідує о обовязку публикувати вшыткы інформациі о охороні жытя і здоровля і в меншыновым языку, была дотримана.

Одпуст при Павловскій Чудотворній Іконі в Шайовпальфали

В послідню неділю серпня/авґуста тр. в селі Шайовпальфаля на Мадярах одбуде ся традицийный русиньскій одпуст при Павловскій Чудотворній Іконі Пресвятой Богородиці. Орґанізаторами подіі сут містна грекокатолицка парохія і Русиньскє Самосправуваня Шайовпальфалі, з підтримком Канцеляриі Премєра Мадяр, Вседержавного Русиньского Самосправуваня і дальшых містных русиньскых самосправувань і орґанізаций на Мадярах. В містным храмі будут служены утренія і літургія, котру буде очелювал владыка Атаназ Орос, єпископ Мішкольцкой Грекокатолицкой Єпархіі. Одпуст є і нацийональным святом Русинів на Мадярах.

Конкурс на карпатскы локальны ініциятивы

Стоваришыня «Pro Carpathia» оголосило конкурс на карпатскы локальны ініциятивы в рамках задачы пн. «Карпатскы локальны ініциятивы», фінансуваной Нацийональным Інститутом Свободы – Центром Розвитку Громадяньского Соспільства з середків Проґраму Фонду Громадяньскых Ініциятив NOWEFIO на рокы 2021-2030. Цілю конкурсу єст м.ін. збільшыти заанґажуваня молодых орґанізаций і неформальных ґруп в публичне жытя. Ініциятвы можут мати ріжну форму, можут то быти прим. едукацийны занятя, варштаты, семінары, подіі інтеґруючы ріжны соспільны ґрупы, едукацийно-інформацийны кампаніі ци діяня для охороны природничой дідовизны. На мін. 35 ініциятив признаных буде разом 350 тис. злотых. Квота єдной мікродотациі то од 3 до 10 тис. злотых. Внескы о дотацию мож склядати до 14. вересня/септембра до 15.00 год.

Санкова найбогатшом сельском ґміном в Малопольщы

На офіцийным сайті часопису «Forbes» опубликуваны были результату ранкінґу, якій вказує найбогатшы самоуряды в Польщы. Іх богатство мірит ся доходом в перерахуваню на єдного жытеля в 2020 р. Серед сельскых ґмін Санкова заняла перше місце в Малопольщы. Нашла ся тіж на барз высокым, єденадцетым місци в цілій державі, з результатом 10 538 зл на єдного жытеля. Што більше, дохід ґміны в порівнаню до 2019 р. єст высшый аж о 88%, є то найвекше однотуване збільшыня серед вшыткых сельскых ґмін. Другє місце в Малопольщы заняла ґміна Мощениця, з доходом 9 434 зл на жытеля. Десяте місце з доходом 7 397 зл на особу заняла ґміна Устя Рускє.