Сумар дня на 20. січня/януара 2022 р.

Приносиме вам сумар медияльной ґрупы ЛЕМ.фм+ на ден 20. січня/януара 2022 р.

Споможме орґанізацию выставы Мирослава Трохановского

Того рока має быти зорґанізувана в ґорлицкій Ґалериі Двір Карвациянів выстава творчости Мирослава Трохановского. Має она мати наголовок «Місто нескінчене». На жаль, Ґалерия не єст в силі найти фінансів на выданя каталоґу, котрый мал бы промувати выставу. З той причыны на сайті www.zrzutka.pl Мирослав Трохановскій зорґанізувал колекту на тоту ціль. Заохочаме спомочы творцю. Як пише Мирослав Трохановскій, каждому, хто не зможе прити на выставу, постарат ся він переслати каталоґ. Мирослав Трохановскій єст выдатным лемківскым іконописцьом і малярьом. Єст основательом карпатской працовні іконописаня в Білянці під назвом «Мандиліон». Занимат ся він тіж малюнком, рисунком і різбом. Цікавит го реалистичне і абстракцийне малярство. Його творчіст то головно навязуваня до істориі украіньскых козаків, як тіж русиньскых збійників. Творит і карпатскы краєвиды і лемківскы церкви.

Згоріла памяткова церков в Старій Стужыци

Як поінформувал митрополита мукачівскій і ужгородскій Феодор з Украіньской Православной Церкви, в ночы з 17. на 18. січня/януара в русиньскым селі на Підкарпатскій Руси – Стара Стужыця, згоріла православна церков св. Миколая Чудотворця. Был то памятковый деревяный храм, якій побудувано в 1905 р. Владыка на своім фейсбуковым конті поіформувал, же єдном з причын пожару, о котрій заявил настоятель храму, могло быти підложыня огня незідентифікуваныма дотепер справцями.

Мірович поздоровил Русинів з іх святом

Председа Покраіньской (Автономічной) Влады Войводины Ігор Мірович поздоровил Русинів з іх нацийональным святом – Дньом Русинів Сербіі, якє в Сербскій Республиці є празднуване 17. січня/януара. За словами Міровича, власти Войводиньской Автономічной Области будут і дальше підтримувати сохраніня языка, культуры і звыків русиньской меншыны. Мірович повіл, же богата культурова дідовизна і традициі русиньского народа сут частьом шыршой культуры, котру на тій териториі плекают Сербы і Русины. Святкуваня нацийонального свята в Сербіі проходят од понеділька, 17. січня/януара 2022 р., і закінчат ся в неділю – 23. січня/януара. Протягом тыжня проходят многы подіі в селах і містах, де жыє русиньскє населіня. В неділю одбудут ся центральны святкуваня в Новым Саді, котрый того рока може гордити ся званьом Европейскє Головне Місто Культуры. Дата Дня Русинів Сербіі приняла ся в 2007 р., а першый раз праздник святкували в 2008 р.

Velo Krynica з позволіньом

Кінцьом грудня/децембра 2021 рока Повітовый Інспектор Будовляного Надзору выдал позволіня хоснувати роверову стежку Velo Krynica. В 2018 році вчас реализациі проєкту до єй побудуваня схоснували інчы материялы як в документациі, зато інвестицию окрислили як будовляну самоволю і не допустили до руху. Три рокы тырват леґализацийна процедура і стараня одзызкати дотацию на побудуваня біциґльовой стежкы Velo Krynica. На около 12-кілометрову трасу ґміна выдала близко 5,5 млн зл. Проєкт реализувал попередній бургомайстер Крениці Дариюш Ресько. Близко 3,4 млн зл з выміненой квоты мала становити дотация з Европейского Фундушу Реґіонального Розвитку. Грошы не трафили єднак на конто Містного Уряду в Креници, бо стежку вздолж потока Криничанка зробили, як ся вказало, як будiвляну самоволю. Аж в 2021 році закінчыли проєктовы роботы, а ґміна отримала згоду маршалка воєвідства на зміну материялу, з котрого зробили стежку.