Сумар дня на 20. січня/януара 2023 р.

Приносиме вам сумар медияльной ґрупы ЛЕМ.фм+ на ден 20. січня/януара 2023 р.

«Basquiat x Warhol. Painting 4 hands» – єдна з найцікавшых выстав того рока на світі

На 2023 рік Фундация Louis Vuitton рыхтує унікатову выставу, яка через вельох критиків штукы є зачысляна до найважнійшых і найцікавшых, якы ся одбудут того рока на світі. Іде о выставу, на якій запрезентуваны будут спільны працы двох вызнаных артистів Жана Мішеля Баскія і Енді Варголя. В роках 1984-1985 створили они спільно близко 160 образів в тандемі «à quatre mains» – в штырі рукы. Дакотры з них сут доднес узнаваны вельома експертами за найвыдатнійшы творы в іх карєрах. Кіт Гарінґ, американьскій артиста, якій был свідком приятельства і творчой спілпрацы обох артистів, споминал на «бесіду, проходячу через малюнок, а не слова» і на споіня двох розумів, якы разом творили «третій, індивідуальный і унікальный розум». Як подає орґанізатор, «Basquiat x Warhol. Painting 4 hands» буде найважнійшом експозицийом, яку посвячено тому надзвычайному доробкови і яка збере понад триста прац і документів, в тым 80 полотен підписаных спільно обома артистами. Представлены будут і окремы працы другых вызначных американьскых артистів того періоду, што має на ціли пробудити енерґію нюйоркской артистичной сцены 80. років ХХ столітя. Выстава буде збогачена знаном серийом фотоґрафій «Боксерскы рукавиці» Майкеля Гальсбенда, створеных до плякату выставы Баскія і Варголя в 1985 р. Выстава буде доступна од 5. квітня/апріля до 28. серпня/авґуста тр. в парку Bois de Boulogne в Парижы.

Крениця типувана до будовы стартовой вежы для санок

Крениця дале старат ся о будову бобслейового тору. Тема была зас порушена при нагоді весіды, в якій брали участ бургомайстер Крениці Пьотр Рыба, Міністер Спорту і Туристикы Каміль Бортнічук і Віцеміністeр Анджей Ґут-Мостовый. Головном темом бесіды были ІІІ Европейскы Ігры Краків і Малопольща 2023, але і другы інвестициі в ґміні Крениця, в тым як раз перспективы розвитку санных спортів в Креници. Як подал, бургомайстер Рыба, місто є актуально типуване до будовы стартовой вежы для санок. З той причыны тырват процедура зміны місцевого пляну просторного заґаздуваня, як і рыхтуваный єст будовляный проєкт того обєкту. Як дале подає бургомайстер Крениці, на конец того рока будут готовы до выпрацуваня полнобранжового будовляного проєкту штучного тору санно-бобслейово-скелетонового, та до отриманя рішыня дозволіня на будову тору.

«Батікы інспіруваны працами Юрия Новосільского» в Музею Ікон в Варшаві

Уж в тоту неділю 22. січня/януара в Музею Ікон в Варшаві одбуде ся інавґурация выставы пн. «Батікы інспіруваны працами Юрия Новосільского». Є то чергова подія Рока Юрия Новосільского, яка припоминат 100. річницю народин того вызначного артисты лемківского походжыня. Експонуваны будут працы участників занять батіку проходячых в Маґазині Штук в Варшаві. Вернісажови буде товаришыл концерт церковной музикы. Як пишут орґанізаторы, творчіст невельох артистів може быти інспірацийом прац выконаных техніком батіку. В тій техніці наперемінно накладат ся на основу верствы воску і барвника. Накладаючы ся фарбы творят похідны одтіни, результатом чого є хроматична гармонія, што є спійне з малярском реториком Новосільского і дозвалят переносити ю на язык батіку. Выстава буде доступна лем місяц, до 21. лютого/фебруара.

«Лемківскы Кабаты» в Етноцентрі Коросняньской Землі

Іщы нецілы два тыжні, до 1. лютого/фебруара, в Етноцентрі Коросняньской Землі мож обзерати выставу інспірувану лемківском культуром пн. «Лемківскы Кабаты». Єй авторком єст Патриция Дильонґ. В своіх роботах малярка інспірувала ся особливо кроями для жен. Як сама описує, захопила ся лемківскым облечыньом, што наштоден єст скромне, а од свята богато здоблене і кольорове. Вступне на выставу дармо.

Фотоґрафія: Jean-Michel Basquiat et Andy Warhol, OP OP, 1984 © Estate of Jean-Michel Basquiat Licensed by Artestar, New York;© The Andy Warhol Foundation for the Visual Arts, Inc. / Licensed by ADAGP, Paris 2022 / © Courtesy of Bischofberger Collection, Männedorf-Zurich