Сумар дня на 20. вересня/септембра 2023 р.

Приносиме вам сумар медияльной ґрупы ЛЕМ.фм+ на ден 20. вересня/септембра 2023 р.

Русиньскій фестіваль в Хорвациі

В Вінковцях, Петровцях i Старых Янковцях в Хорвациі од пятниці 22. вересня/септембра проходил буде Медженародный Культурный Проґрам «Коли летіла голубиця», котрого орґанізатором є орґанізация Дружство «Руснак». Як раз тота русиньска орґанізация буде празднувала товды 20-літя основаня і свойой діяльности. Окрем той річниці на подіі будут споминати іщы на 100. річницю публикациі «Ґраматикы бачваньско-руской бесіды» та 200. річницю народин будителя Александра Духновича. В проґрамі м.ін. фільмовый вечер, то в пятницю, а в суботу – засіданя Світотой Рады Русинів, обзераня церкви Покровы Пресвятой Богородиці в Петровцях та культурный проґрам «Коли летіла голубиця», вчас котрого запрезентуют ся м.ін. ансамбль Голубок з Переґу Маре в Румуніі, запрезентуют ся Культурно-Умелецкы Домы: «Осиф Костельник» з Вуковару, «Яким Гарфи» з Петровців, «Чаковці» ци Голубчатка, Голубкы та співацка ґрупа і окрєстра од орґанізатора – Дружства «Руснак».

В Польковицях дальшы інвестициі

Міністер Кжыштоф Кубув передал на рукы бургомайстра Польковиц Лукаша Пузьнєцкого чек на веце як, 1,8 млн зл з перезначыньом на будову дорогы в Казімєжові. В рамках інвестициі зроблят розбудову сіти і освітліня. Грошы походят з урядового проґраму Польскій Лад для попееґєровскых ґмін. То уж чергова едиция середків з того проґраму, што будут переданы на інвестицийны ціли на обшыри самоурядів польковицкого повіту. В найблизшым часі черговы середкы, тым разом з урядового проґраму охороны памятників, вплынут на конта самоурядовців. Ґміна Польковиці од початку той каденциі здобыла зовнішні середкы з ріжных джерел, в тым уряодовых, самоурядовых і унійных, на квоту веце як 120 млн зл.

Неє уж постерунку в Устю Рускым – єст комісарият

Постерунок Поліциі в Устю Русым стал ся комісариятом. Завдякы тому буде веце етатовых поліциянтів, котры будут дбати о безпеку в реґіоні. Торжествене одкрытя Комісарияту в новым будинку прошло 14. вересня/септембра. Комендантом остал асп. шт. Славомир Добек. Пят новых етатів спричынило, што в єдиници працувало буде 15 поліциянтів. На одкрытю присутны были парляментаристы, представникы соймику малопольского воєвідства, самоурядів ґорлицкого повіту, служб, што спілдіют з Поліцийом, капеляны Поліциі, в тым о. Андрий Ґрич.

Іщы векша туристична атракцийніст реґіону

Іщы до 28. вересня/септембра мож зголошувати в рамках соспільных консультаций заувагы до проєкту «Трансгранична спілпраца» в обшыри туристикы і культуры на терені ґмін належачых до Союзу Ґмін Басену Вислокы і Пряшівского Самосправного Краю». В рамках проєкту партиципанты хотят через розмаіты активности піднести туристичну атракцийніст польско-словацкого погранича і зактивізувати локальну споспільніст і туристів. Серед найважнійшых задач находят ся м.ін. розбудова мобільной аплікациі Ґміны Санкова (о природничы і історичны атракциі, тематичны шлякы, печатаня фольдеру і фільму промуючого локальны продукты Ґміны Санкова), допосажыти осередок культуры в Ґміні Хмельова, утворити стрефу реляксу в Ґмінах Курів, Нижня Полянка і Свидник та зробити інформацийны таблиці на деревяный грекокатолицкій храм – церков покровы свв. Космы і Даміяна в Лукові. Окрем того в рамках проєкту орґанізуваны будут спільны фестівалі і культурны подіі, варштаты і інчы. Заувагы до проєкту мож подавати через формуляр доступный на сайті проєкту wisloka.pl.

Фот. www.powiatgorlicki.pl