Сумар дня на 20. жолтня/октобра 2022 р.

Приносиме вам сумар медияльной ґрупы ЛЕМ.фм+ на ден 20. жолтня/октобра 2022 р.

В Білянці така таблиця як при ґорлицкій бурсі

В остатнім часі ведеме кампаніі, цілю якых єст інформувати сусідів Поляків і інчых громадян, але і туристів, што хоц сме невеликым народом, то духом сме богаты і маме ся чым похвалити. Літом была одкрыта перша таблиця при історичній будівли Руской Бурсы в Ґорлицях. Находят ся на ній основны інформациі о Лемках і нашій орґанізациі. Што важне при цілій кампаніі – інформуючы тексты сут поміщены в лемківскым языку, а на другым місци в анґлицкым. Друга таблиця перед парома днями была поставлена в Білянці, символичным селі, кєд іде о одроджыня Лемковины. Таблиця находит ся при хыжы родины Трохановскых. Поміщены на ній тексты інформуют о тым, што в Білянці вродил ся, пак по выгнаню вернул і долгы рокы діял Павел Стефановскій. Дознате ся тіж, што в 1969 р. был в Білянці основаный Ярославом Трохановскым Репрезентацийный Ансамбль Лемків в Польщы «Лемковина», і же в 2008 р. в тым селі были поставлены першы двоязычны (польско-лемківскы) таблиці з навом місцевости.

В неділю Лемківскій Кєрмеш в Йонкерс

В найблизшу неділю, 23. жолтня/октобра, в Йонкерс в штаті Ню Йорк одбуде ся шторічный Лемківскій Кєрмеш, інформує нашу редакцию лемківскій еміґрацийный діяч Андрий Медвід, якій одповідат за рыхтуваня Кєрмешу. Подія зачне ся о 15.00 год. за локальным часом. Вступне є платне, але в його рамках буде жыва русиньска музика од ґрупы Lem Joy Trio. Медвід повіл, што радіє з того, же завдякы лемківскым медиям вшыткы по цілым світі можеме ся віртуально чути і быти разом духом на такых подіях.

На вікенд «Лемковина Ультра Трейль»

Уж в найблизшу соботу зачнут ся тогорічны осінні змаганя в літаню «Лемковина Ультра Трейль». Подібні як в попередніх роках возме в них участ міцна репрезентация Лемків – тых жыючых на Лемковині, але і тых, якы змагати ся придут з чужыны. Лемкы выстартуют во вшыткых катеґориях бігу окрем того на 100 км, значыт будут летіти на 30, 48, 70 і 150 км. Найдолша траса веде такой через цілу Лемковину – од Крениці до Команчы, а найкоротша зачынат ся в Пулавах і кінчыт в Команчы. Заохочаме кібіцувати!

ПСК реализує Poloniny Trail

Проєкт Пряшівского Самосправного Краю (ПСК) Poloniny Trail наберат реальны контуры. Зачынат ся з будова першых двох части біциґльового округу, од Стащына коло резервуару Старина аж по бывше село Рускє. В рамках проєкту Poloniny Trail ПСК зачне реализувати будову двох роверовых трас долгости 23 км. Має схвалене фінансуваня в сумі близко 5 млн евро на добудуваня цикльоінфраструктуры в части Старина – бывше село Рускє, і дальшых 3,5 млн про част Стащын. Розвиткови туристичного руху в реґіоні Снина і в обшыри Нацийонального Парку Полонины поможут і дальшы активности. Єдном з них єст проєкт Карпатска Мобіліта з розрахунком 1,15 млн евро, де партнерами сут села Стащын і Улич, Лісогосподарскій Маєток Улич, а на украіньскым боці село Великій Березный і Меджереґіональный Центр Черезграничной Спілпрацы з Перечына. Карпатска Мобіліта як част Poloniny Trail має в сумі чыслити 87 км.