Сумар дня на 21. червця/юнія 2023 р.

Приносиме вам сумар медияльной ґрупы ЛЕМ.фм+ на ден 21. червця/юнія 2023 р.

Xто буде директорувал в Ґладышові і Устю?

Iщы до 3. липця/юлия тырват набір кандидатів на директорів шкіл в Ґладышові і Устю Рускым. Іде конкретні о становиско Директора Шкільно-Предшкільного Комплексу в Ґладышові та Директора Комплексу Шкіл в Устю Рускым. Конкурс, згідні з записами уставы про ґмінный самоуряд, Освітового Права та Розпоряджыня Міністра Нацийональной Едукациі, оголосил війт ґміны Устя Рускє Збіґнєв Людвін, як орґан, котрый веде вымінены публичны школы. Кандидаты охочы обняти директорскє становиско окрем ріжных докумнетів, тыкаючых дотеперішнпй карєры і професийного досвіду, в своій оферті мусят представити концепцию фунґуваня і розвитку публичной школы, на заряджаня якой претендуют. Оферты мож складати в секретарияті уряду ґміны Устя Рускє, традицийном або електронічном почтом. В обох школах од років ведене єст вчыня лемківского языка во вшыткых клясах, так само в шкільным році 2022/2023. О терміні і місци проведіня конкурсового поступуваня кандидаты будут індивідиальні поінформуваны. Дотеперішніма директорами шкіл сут: в Ґладышові Кристина Михаляк та Ізабеля Сенк в Устю Рускым.

Стріча з міністром в справі Світового Конґресу Русинів

В четвер 15. червця/юнія сербскій Міністер дс. Прав Чловека, Прав Меншын і Соспільного Діалоґу Томислав Жыґманов принял делеґацию русиньской меншыны – ведучого орґанізациі Руска Матка Михайла Фейсу, ведучого Нацийонального Совіту Русиньской Меншыны Йоакыма Раца і ведучого Головного Одбору Желько Ковача. Стріча в бельградскым міністерстві была звязана з орґанізацийом зближаючого ся Світового Конґресу Русинів, котрый тот рік має зрыхтуваты в Новым Саді орґанізация Руска Матка. Присутных має быти коло 150 делеґатів з девятох держав, што спричынят, же є то велика подія, на котру треба забезпечыти одповідні середкы. Як подає в нотці зо стрічы Олена Папуґа, обіцяных середків є або менше, як обіцяно, або не буде іх нияк. Міністер признал вагу той подіі не лем для самых Русинів, але і для Сербіі і обіцял заанґажувати ся в поміч.

Безпека над Климківком

В четвер 15. червця/юнія зачал ся туристичный сезон над озером в Климківці. Дижуры зачали вести порядково-ратунковы службы – Сезоновый Постерунок Поліциі та Охотнича Служба Порядку на Воді. Дижуры будут ведены штоденно аж до половины вересня/септембра, значыт до закінчыня сезону. Новістю єст, што безпекы на воді будут пильнувати з патрольовой лодкы, што закуплена была завдякы фінансовій підпорі Воєвідского Фундушу Охороны Середовиска і Водной Господаркы в Кракові. На выпосажыню постерунку сут іщы квад і роверы. Купелиско на Климківці буде офіцийні одкрыте 1. липця/юлия. Вызначены будут два місця до купаня – єдно плытше, для діти, другє глубоше.

В палаци будут сохраняти соспільну памят

В минулым тыжни в Сухій Ґурній прошла символична подія переданя ключів до одремонтуваного палацу в реченій місцевости. Центр Культуры в Польковицях офіцийні перенял тым самым будинок під заряджаня. Аґнєшка Компаніцка-Дычко з Центра Культуры вчас подіі подала, што хотят зорґанізувати гын соспільный архів, котрый буде вказувал істориі осіб, якы замешкали в тамтым реґіоні по зміні границ по 1945 році. «Культурный котел лучыт нас і ділит, зато цікаве буде, кєд познаме себе і своіх сусідів, іх традициі і звыкы» – повіла. О тым, што конкретні буде ся находило в палацовых поміщынях, мают рішыти жытелі в рыхтуваных іщы на червец/юній соспільных консультациях. Участ в них возмут тіж самоурядовці і особы досвідчены в креуваню культурно-історичных ініциятив. Палац в Сухій Ґурній од 1981 рока обнятый є консерваторскым надзором і вписаный є до реґістру памятників.

Фот. www.ruskeslovo.com