Сумар дня на 21. грудня/децембра 2021 р.

Приносиме вам сумар медияльной ґрупы ЛЕМ.фм+ на ден 21. грудня/децембра 2021 р.

Быти може уж в будучым році в Малопольщы появит ся новый курорт

Власти ґміны Мушына зложыли внесок до Міністерства Здоровля признати статус курорту для місцевости Злоцкє. Як передал для Радия Краків бургомайстер Мушыны Ян Ґольба, наданя такых прав дає можливости позыскати новы середкы ци старати ся о курортны оплаты. Додатково курортна зона може обняти тіж дві сусідні місцевости, Щавник і Астрябик. Бургомайстер додал, же то шанса на розвиток туристикы во вшыткых трьох місцевостях. Закля што ресорт принял внесок, але фінальне рішыня в тій справі підойме Рада Міністрів в половині будучого рока.

«Заінспіруваны лемківском культуром» 

Стоваришыня Підпоры Локальных Ініциятив Команчы «Волк» закінчыло проєкт «Заінспіруваны лемківском культуром». Головном цілю проєкту было створити модель 3D неістнуючой уж церкви в Лупкові. В рамках ініциятивы возник не лем фільм, але тіж аплікация. Додатково при спілпрацы з Ґміном Команча попрятали і очыстили стежку вздолж цмонтеря, так же спокійні можна собі підыйти і посмотріти, де находила ся церков і як выглядат забытковый цмонтір в Новым Лупкові. Стоваришыня заохочат, жебы в часі вандрівок і обзераня корыстати з іх аплікациі, што дозволит ліпше си уявити, як колиси выглядала церков.

Онедолга закінчыт ся ремонт ґорлицкого басену

Початково роботы при ґорлицкым басені мали ся закінчыти в жолтни/октобрі, але як пояснят бургомайстер Ґорлиц Рафал Кукля, пандемія та опізніня в доставі материялів зробили неможливым одкрыти басен перед кінцьом того рока. Роботы докола обєкту ідут ґу кінцьови, а і в середині не дуже уж ся лишыло до ремонтуваня. Одновленый басен буде не лем безпечнійшый і барже модерный, але тіж буде мал новы атракциі, такы як сауна ци солянкова ґрота. На тоту хвилю не подано іщы докладной даты, коли обєкт зас буде міг служыти жытелям ґорлицкого повіту.

Перша лемківска кухарска книжка

Припоминаме, што до кінця грудня/децембра тр. тырват соспільна колекта на печатаня першой лемківской кухарской книжкы. В публикациі найде ся яж 70 провіреных ориґінальных рецептур. Каждый, хто хоче мати примірник книжкы, може зробити передплату в соспільній кампаніі збераня грошы на выпродукуваня книжкы на сайті zrzutka.pl. Колекту глядайте під назвом: Łemkowskie smaki – wydanie książki kucharskiej.

Театральна ґрупа Племя просит на святочну пєсу

На конец добра новина для любителів театру. По успіху звязаным з презентацийом спектаклю «Бескідскы Дзяды» меджепоколіньова театральна ґрупа Племя не одпущат і уж рыхтує нову пєсу. Тым разом просят на спільне святкуваня різдвяного періоду при пєсі пн. «Вертеп» в режысериі Мариюша Лясковского. Як заповіла лідерка ґрупы і авторка сценария Моніка Бабуля, подібні як і при попередніх спектаклях буде нетипово і з одкликанями до Низкого Бескіду. Не бракне музикы ци коляд в аранжациі Мирослава Боґоня. Премєра пєсы одбуде ся 26. грудня/децембра о 18.00 год. в церкви св. Параскєвы в Устю Рускым. Пак спектакль мож буде іщы видіти 27. грудня/децембра та 8. і 9. січня/януара 2022 р. Чысло місц ограничене.