Сумар дня на 21. грудня/децембра 2022 р.

Приносиме вам сумар медияльной ґрупы ЛЕМ.фм+ на ден 21. грудня/децембра 2022 р.

В ЕЛЕОС-і інвестициі

Православный Осередок Милосердя ЕЛЕОС Перемышльско-Ґорлицкой Єпархіі того рока зреализувал пару інвестиций. В рамках проєкту «Інформацийный Центр в Ґладышові» поставили окремe деревянe задашыня з можливістю одпочати для туристів, што приходят в тамту част Лемковины. А в посліднім часі повело ся получыти два будинкы ЕЛЕОС-у: старый (де находят ся поміщыня Варштатів Занятьовой Терапіі та Хоронены Мешканя) з новым будинком (де жыют біженці з Украіны). Получыньом можут переміщати ся тіж особы на візках. Будова лучника была коштовна і закінчыла найпильнійшы будовляны роботы при будинках ЕЛЕОС-у в Ґладышові.

В Бельграді бесідували про едукацию меншын

Вчера в Бельграді в Міністерстві Просвіты Республикы Сербіі проходили консультациі пн. «Едукация нацийональных меншын, в тым едукация учытелів языків нацийональных меншын». Бесідували м.ін. про розвитковы пріоритеты і активности в обшыри едукациі в надходячым часі. Нацийональный Совіт русиньской нацийональной меншыны репрезентувала Олена Папуґа, членкыня совіту.

Польковиці кінчат буджетовый рік на плюсі

Тогорічный буджет Польковиц запре ся веце як 20-мілийоновом надвыжком. Тепер тырвают роботы над його формом в будучым році. Радны представили уж бургомайстрови своіх парудесят поправок. Як подал бургомайстер Пузнєцкій – вельо з поправок буде взятых до увагы, але про част має вантпливости, особливо взглядом тых, што могли бы загорозити фунґуваню спортовых клюбів, Учельні Яна Выжыковского, безпеці мешканців ци втратом позыскуваня зовнішніх середків. Бургомайстер запросил уж радных до бесід, жебы выпрацувати найліпшы розвязаня і довести до компромісу перед сесийом, коли буджет буде уж схваляный.

Хто переміг в конкурсі о Літературну Нагороду Мариі Мальцовской?

30. грудня/децембра в просторах Інституту Русиньского Языка і Культуры Пряшівского Університету пройде презентация робіт, котры перемогли в конкурсі о Літературну Нагороду Мариі Мальцовской на найліпшы творы в обшыри поезиі, прозы, есеів і драмы в літературным русиньскым языку. Тогорічна едиция конкурсу є уж девятом, а його орґанізатором є Сполок Русиньскых Писателів Словациі во спілпрацы з Академійом Русиньской Культуры Словацкой Республикы і Інститутом Русиньского Языка і Культуры Пряшівского Університету. Найліпшы творы будут опубликуваны в часописі «Русин». Початок презентациі о 11.00 год.

Ровером долином Дунайця

Трасу VeloDunajec выріжнили як «Найцікавшый Туристичный Продукт» в рамках ХІХ едициі конкурсу на Найліпшый Туристичный Продукт – Цертифікат Польской Туристичной Орґанізациі 2022. В склад оцінюючой капітулы покликаной презесом Польской Туристичной Орґанізациі вошли выдатны експерты з обшыри туристикы і маркетінґу. Ґаля вручаня нагорід прошла 15. грудня/децембра. VeloDunajec то єдна з осмох роверовых трас побудуваных в рамках проєкту VeloMałopolska. Єй долгіст то 237 км, з чого 80% трасы єст переіздна, для бракуючых фраґментів сут пропозициі обіздів. О популярности трасы VeloDunajec рішают м.ін. пласкы, асфальтуваны дорогы одділены од руху авт, але тіж видокы на Татры, Пєніны, памятникова деревяна архітектура на трасі, дворы і замкы. На полудни VeloDunajec лучыт ся зо Шляком Довкола Татер, од Старого Санча має спільну пут з VeloNatura/EuroVelo11, а на пілночы лучыт ся з Вісляном Роверовом Трасом.

Фот. Фб-профіль Православный Осередок Милосердя ЕЛЕОС Перемышльско-Ґорлицкой Єпархіі