Сумар дня на 21. квітня/апріля 2020 р.

Приносиме вам сумар медияльной ґрупы ЛЕМ.фм+ на ден 21. квітня/апріля
2020 р.

Лісы зас сут одкрыты для туристів

Од понеділька, 20. квітня/апріля, державны лісы зас сут одкрыты. Праві ціла обшыр заряджана Державныма Лісами вернула до публичного хоснуваня. Праві, бо закрыты дальше сут туристично-лісны інфраструктуры, такы як ватряны задашыня, шатровы поля, пляцы забав та вежы і відокови тарасы. Обєкты вылучены з хоснуваня были специяльні означены лісниками. Окрем лісів одкрыты сут тіж в більшости Нацийональны і Ландшафтны Паркы та паркінґы і місця одпочынку для вандруючых. Дальша добра віст то факт, же по лісі і шляках можна вандрувати без масочок, але увага – не тыкат ся тото паркінґів. Хоцкі ограничыня будут помалы одкликуваны, дальше треба тримати безпеку. Заряд Державных Лісів апелює, жебы не стрічати ся в лісах, уникати місц, де єст вельо люди, і тримати вымагану одлегліст. Припоминат тіж о великым загорожыню пожарами зо взгляду на пануючу сушу. Одкрытя лісів то першый пункт з пляну одкликаня ограничынь звязаных з епідемійом. Окрем того од вчера більше осіб може в єдным часі робити закупы ци брати участ в реліґійных обрядах. Особы выже 13-ого рока жытя можут самы ся переміщати.

«Ніт для Ізоляториі в Креници», не лем жытелі сут проти 

В остатнім часі інформували сме про три новы ізоляториі, котры мали возникнути в Креници. Єднак воєвода вернул своє рішыня. Проти ізоляториям выповіли ся власти міста, його жытелі та особы звязаны з Креницьом, а то причынило ся до зміны рішыня воєводы Пьотра Цвіка [Ćwika]. Початково ізоляториі мали ся находити м.ін. в Старій і Новій Здройовій Хыжы ци Войсковым Шпытали. Не сподабало ся тото мешканцям, котры барз міцно зареаґували м.ін. на Фейсбуку, де возник профіль «Ніт для Ізоляториі в Креници». Арґументы, якы явили ся проти, то м.ін. страх о безпеку жытелів і о туристів в пізнійшым часі. Як ся подає, ізолатория в такій малій місцевости знищыт ю, не лем економічні, але тіж социяльні і здравотні. Протестуючы звернули тіж увагу на многє чысло старшых жытелів, котры находят ся в ґрупі збільшеного ризика. На офіцийным сайті протесту вказала ся петиция, котру підписуют не лем мешканці Крениці, але тіж сусідньой Мушыны, а голосів єст уж понад два тисячы.

Што нового в Радоцині?

Лишено думку о будові трасы в коренях дерев в Радоцині, але будут другы атракциі. В надлісництві Радоцина як раз закінчено будову колибы, котра, як бесідує Юзеф Леґутко, тепер має чысто інчый стандард туристикы. По перебудові і затверджыню умовы на ґастрономічны услугы лишыло ся уж лем ждати на закінчыня епідеміі і можна принимати гості. Як заповідат надлісництво, то іщы не конец. Протягом найблизшых трьох років на обшыри осередка ма возникнути аж єденадцет новых обєктів. Іх задачом буде не лем дати розрывку для одвиджаючых, але будут тіж мати едукацийну функцию. Некотры з новых проґрамів мают быти трансграничны. Леґутко бесідує тіж, же не лишат плянів побудуваня трасы в коренях дерев, але на тоту хвилю треба тото одложыти в часі, пляны штырьох шляків для студентів, а аж і предшколяків, долгости 25 км, напевно будут зреалізуваны. Цікавом інвестицийом єст плян будовы едукацийного задашыня в стилю лемківской хыжы, де находила ся буде едукацийна стежка ци місце на ватру.

Важнa рептилия, о змыях з Бєшад і Низкого Бескіду

В Бєшадах і Низкым Бескіді находит ся штораз більше змый. То єдины ідовиты рептилиі, што жыют в Польщы, і хоцкі самы забивают барз мало люди, то часом сут жертвами. Вельох еколоґів апелює, же змыі сут барз позитивны і мают барз важну функцию в середовиску. Апель звязаный єст тіж з одкрытьом лісів, де тепер барз часто можна стрітити тоты рептилиі, коли змыі мают ґодовый період і сут найбарже активны. Прото апелує ся о безпеку на луках ци каменисках, де барз часто находят ся змыі. Припоминаме тіж, же николи самы не атакуют, покля не почуют ґу тому причыны, а одстрашыти іх можна міцно тупкаючы.