Сумар дня на 21. квітня/апріля 2021 р.

Приносиме вам сумар медияльной ґрупы ЛЕМ.фм+ на ден 21. квітня/апріля 2021 р.

В Сербіі председы русиньской і словацкой орґанізаций підписали меморандум

Як сме уж інформували, од 12. до 17. квітня/апріля тр. проходила робоча візита Мілана Яна Піліпа, председы Уряду про Словаків жыючых заграницьом, в Сербіі. Піліп был і в Рускым Керестурі, де в рамках неофіцийного проґраму стрітил ся з русиньском спільнотом. При нагоді візиты Піліпа, активного в русиньскым руху на Словациі, председове Нацийонального Совіту Словаків і Нацийонального Совіту Русинів, Лібушка Лакатошова і Борислав Сакач, підписали 16. квітня/апріля меморандум. Як подала аґентура Рутенпрес, меморандум має на ціли розвиток односин медже словацком і русиньском меншыном в Сербіі, меджекультурну спілпрацу, признаваня традицийных і історичных цінности двох народів Войводины, як і выміну досвіду в обшыри культуры, освіты, інформуваня і урядового хоснуваня языка і писма. Меморандум має быти схонуване і як формальна основа для збільшыня фінансуваня з европейскых фондів, што поможе творити культурну автономію обох меншын.

“Ожывліня дідовизны русиньской культуры”

Од 19. квітня/апріля тр. в селі Гостовиці, сниньского окресу, перед сельскым урядом мож обзерати выставу фотоґрафіі пн. «Ожывліня дідовизны русиньской культуры». Авторка выставы Мария Ґалишінова має русиньскє походжыня. При помочы артистичной фотоґрафіі хоче ожывити красу русиньской культуры і приближыти ю шыршій публиці. Мария Ґалишінова подумала і на тых, котрым до Гостовиц далеко – експозиция проходит і в онляйн просторі. Веце о проєкті і мотузок до выставы найдете на нашым портали.

Конкурс о дофінансуваня едукацийных задач в Малопольщы

До пятниці, 23. квітня/апріля, мож складати оферты в конкурсі «Малопольща! Постав на едукацию!». В рамках проєкту дофінансуваны будут задачы такы як: орґазнізация цікавых подій, конкурсів, фестівалів і інчых діянь о едукацийным характері. Цілю конкурсу єст поправити едукацийны шансы. Акция не єст направлена лем на діти і молодіж, в конкурсі можут взяти участ і старшы особы. Проєкты мают ся причынити до збільшыня компетенций учеників та быти інспірацийом для шкіл і публичных орґанізаций до ріжных едукацийных діянь. Заряд Малопольского Воєвідства передал в текучым році на реализацию задач выбраных в рамках конкурсу 400 тис. злотых.

Вытяг на Маластівскій Маґурі буде одкрытый в літнім сезоні

Уж в тым році креселковый вытяг на Маластівскій Маґурі має быти не лем зимовом атракцийом. Плянуют го одкрыти для туристів і в літнім періоді. Як повіла для Радия Краків війт ґміны Санкова, Малґожата Малух, вшытко залежыт од пандемічной ситуациі. В 2020 з причыны ограничынь не повело ся удоступнити вытягу. В тым році, кєд не буде заказу, обєкт мал бы діяти в літнім сезоні хоцкі в вікенды. Од минулого рока на верху Маластівской Маґуры находит ся родинный парк. Завдякы одкрытю вытягу в вакацийным періоді, буде там мож одпочати і позерати на гірску панораму і літом.