Сумар дня на 21. липця/юлия 2022 р.

Приносиме вам сумар медияльной ґрупы ЛЕМ.фм+ на ден 21. липця/юлия 2022 р.

В Малым Липнику посвятили одновлену церков

В неділю, 17. липця/юлия, на праздник блаженного священномученика Павла Петра Ґойдича, апостольскій адміністратор грекокатолицкой Пряшівской Архієпархіі владыка Петро Руснак пришол зо свойом пастырском візитом до Малого Липника. Пришол в тот ден посвятити одновлену церкву. Середина місцевого храму, котрый є присвяченый святым безсребреникам і чудотворцям Космі і Даміянови, перешол парорічный комплексовый ремонт. Владыка перед початком архієрейской літургіі посвятил новый престіл, жертвенник, одновленый іконостас, новы лавкы і одновлены розписы на стінах. Малый Липник то важне село на Пряшівскій Руси, кєд же од парох років одбыват ся в ним шторічный фестіваль – Русиньска Ватра.

Запрошыня на 11. Лемківскій Вечер

15. серпня/авґуста в Коросні одбуде ся 11. Лемківскій Вечер, в рамках котрого выступит Оркєстра Святого Миколая. Подія має быти нагодом, жебы познати звыкы, музику і кухню жытелів Лемковины. Концерт одбуде ся в Реставрациі Паркова о 19.00 год. Вступне то 30 зл і вымагана є скорша резервация. Лемківскы Вечеры были заініциюваны в вересни/септембрі 2014 р. Анном Романьчак і Пшемком Поляньскым, товды музиками ансамблю А де то давнійше строіло. Каждый вечер орґанізуваный єст коло якісой головной темы. В рамках акциі доповіди на ріжны лемкознавчы темы давал тіж др Тадеуш Лопаткєвич. Вчас подіі буде мож покоштувати лемківскы стравы. Рецептуры на них орґанізаторы зберали од жытелів Лемковины, ходячы по ріжных нашых селах.

Лемківскій Стипендийный Фонд ім. Русенка

Припоминаме, што Товариство для Розвитку Музею Лемківской Культуры оголосило рекрутацию кандидатів до стипендий Лемківского Стипендийного Фонду ім. Івана Русенка. Жебы старати ся о таку стипендию, треба быти тогорічным матуристом, найти ся на списку принятых на студиі єдной з публичных высшых шкіл – університетів, політехнік ітп. в Польщы, і сполнити пару додаковых вымогів. Стипендия выносит 700 зл місячні през цілый І рік студиюваня, комплет документів треба зложыти до 9. серпня/авґуста. Цілю Лемківского Стипендийного Фонду ім. Івана Русенка є фінансово підперти здібных Лемків і пропаґувати доробок Івана Русенка серед лемківской молодежы. Полну інформацию про вшыткы вымогы і потрібны до зложыня документы найдете на сайті zyndranowa.org та на нашым портали.

Лемківску Ватру задумали в хыжы Трохановскых в Білянці

Заран в Ждыни зачынат ся фестіваль – 40. Ватра, яку орґанізує Обєднаня Лемків з Ґорлиц. Треба припомнути, хто і коли выдумал Ватру, яка в першых роках была незалежном лемківском еманципациймом подійом. Лемківску Ватру выдумали не хто інчый як братя Ярослав і Петро Трохановскы вєдно з Володиславом Грабаном, на стрічы в хыжы Маестра Трохановского в Білянці, на котрій присутна была тіж Стефанія Трохановска. Подія была придумана як Музичны Пленеровы Варштаты Ансамблю Лемковина «Лемківска Ватра». І Лемківска Ватра одбыла ся в 1983 р. в Чарній коло Устя Руского. Істо лемківскых Ватр было лем вісем – до 1989 р. В 1990 р. подію перенесено до Ждыні, на пляц, якій оглядали первістны орґанізаторы при участи товдышнього ведучого Стоваришыня Лемків, Андрия Копчы. Ватру в 1990 р., яка орґанізувана была уж в Ждыни, розпалил іщы ведучый Стоваришыня Лемків. Єднак подія была підступом перенята через проукраіньскых діячів з Обєднаня Лемків. Теперішня Ватра то подія, на якій ніт уж лемківского патріотичного духа, што был присутный на давных Лемківскых Ватрах, а лем сильно зъідеолоґізувана імпреза.