Сумар дня на 21. лютого/фебруара 2024 р.

Приносиме вам сумар медияльной ґрупы ЛЕМ.фм+ на ден 21. лютого/фебруара 2024 р.

Члены СКУтНіЕМ стрітили ся з маршалком Сойму Шымоном Головньом

В понедільок 19. лютого/фебруара маршалок Сойму Шымон Головня стрітил ся з членами Спільной Комісиі Уряду та Нацийональных і Етнічных Меншын. Як підкрислили участникы – была то перша того рода стріча в 19-літній істориі Комісиі. «Нацийональны і етнічны меншыны сут силом Польшы, а не єй слабістю» – підкрислил маршалок Головня. Зазначыл тіж, што єст готовый на діалоґ з членами Комісиі. Тоты же звернули увагы на актуальны проблемы меншын. Поінформували, што залежыт ім предовшыткым на тым, жебы створити условія, в котрых Комісия могла бы реализувати своі задачы, і підкрислили, же в польскым парляменті той кадениці неє ани єдного політика, што репрезентувал бы меншыну. Вчас стрічы вызвучала опінія, што то уж послідній момент, жебы сохранити культурову спадковину меншын, котра є тіж історийом польской державы. Маршалок Сойму высловил охоту продолжати дорічны стічы з членами Комісиі та выявил заінтересуваня дальшом спілпрацом. Участны были м.ін. Григорий Куприянович – спілведучый Спільной Комісиі, представник украіньской меншыны, Мирослава Копыстяньска, як передставничка лемківской меншыны, Людомір Моліторіс зо словацкой меншыны ци Рафал Бартек і Бернард Ґайда – представникы німецкой меншыны.

Во Вроцлаві торжествували вельокультуровіст

Так само позавчера прошла інча вельокультурова стріча – во Вроцлаві прошла ґаля святкуваня 15. річниці підписаня Порозумліня Калейдоскоп Культур, котрого сиґнатариями были в 2009 році представникы: жыдівской, німецкой, ормяньской, караімской, украіньской, ромской, татарской і грецкой соспільности. Речене Порозумліня то офіцийне догваріня о спілпрацы позаурядовых орґанізаций, підметів і фізичных осіб для нацийональных і етнічных меншын. Його цілю од самого початку є м.ін. соспільна і громадяньска активізация членів меншыновых соспільности Нижнього Шлеска, протидіяня дискримінациі, промуваня вельокультуровости, а тіж промуваня спілдіяня з самоурядом, державным сектором, з політиками. Понедількове торжество проходило в будинку Етноґрафічного Музею при присутности Президента Вроцлавя Яцка Сутрыка, якій повіл м.ін., што «през вельо років то нацийональны і етнічны меншыны творили вельокультуровый характер нашого міста. Мы вєдно з нима вчыли ся меджекультуровой спілпрацы і діалоґу». Медалі Merito de Wratislavia в подякуваню за роботу президент Яцек Сутрык вручыл Ельжбєті Берендт, вельолітній кєрівничці Етноґрафічного Музею та Марийоли Абкович, сиґнатариюшці Порозумліня Калейдоскоп Культур, тепер – ведучій Рады Фундациі Калейдоскоп Культур.

«Подолянкы» по лемківскы і по польскы

27. лютого/фебруара в польковицкым Кіні вызвучат польскы і лемківскы співанкы в выконаню Народного Ансамблю «Подолянкы». Буде то концерт пн. «Любов по народному (Miłość na ludowo)». «Ґрупа Подолянкы з Новой Веси Любіньской перенесе нас в захоплюючу подорож через музичну спадковину, презентуючы своі інтерпретациі традицийных пісен о любови» – подає орґанізатор концерту. Співочій части ансамблю акомпаніювати будут музикы на акордеоні, басах і бубні. Ансамбль был основаный в 1985 році, в його репертуарі од самого початку сут пісні співаны в польскым і лемківскым языках.

1,5% податку для ЛЕМ.фм

Ближыт ся час розрахуваня податків за 2023 рік. Каждый може розпорядити 1,5% свого податку і передати го на ціль выбраной орґанізациі публичного хосну. Звертаме ся до Вас з прошыньом, жебы помочы нам в утриманю стацийонарных высылачів радия ЛЕМ.фм і передати 1,5% свого податку на тоту ціль. Шаліюча інфляция спричынила, што не сме в силі утримати оба высылачы лем з міністерияльной дотациі і горозит нам вылучыня єдного з них (в Польковицях або в Ґорлицях). Утриманя іх то барз великій кошт, але віриме, што з Вашом помочом поведе ся нам – старчыт, же при розрахуваню передате 1,5% свого податку для Стоваришыня Польскых Музиків Камералистів з дописком «ЛЕМ.фм», номер КРС то: 0000517330. Дякуєме за каждый ґрош!