Сумар дня на 21. січня/януара 2021 р.

Приносиме вам сумар медияльной ґрупы ЛЕМ.фм+ на ден 21. січня/януара 2021 р.

Лемківскій Річник 2020

Вышол «Лемківскій Річник 2020», якій выдає Стоваришыня Лемків. Посліднє выданя присвячене єст по перше 80. річници першых переселінь до «Росиі», але так само ювілейови Лемківской Ватры на Чужыні, котрой сполнило ся дотля сорок едиций. «Лемківскій Річник» посвяченый єст тіж памяти єдного з найвызначнійшых лемківскых діячів середнього поколіня, Богданови Ґамбальови, якій вмер 2. липця/юлия 2020 р. В книжці найдете дописы авторства Анны Кырпан як раз про переселіня на схід ци Андрия Копчы про історию михалівской Ватры. Даміян Новак в польскоязычній статі описує історичны діі повязаны з плянами одкрытя в Ґладышові повітового суду за Австриі. Чытати можеме в публикациі і статю Маестра Ярослава Трохановского, котрый описал свою артистично-інструкторску дорогу, яка зачала ся барз скоро, іщы на західніх землях Польщы. Олена Дуць-Файфер приправила споминовый текст на Богдана Ґамбаля. В части «Ювіляре» находят ся дві статі посвячены як раз Маестрови Трохановскому і др габ. Олені Дуць-Файфер. Внутрі книжкы являт ся выстава посвячена михалівскым ватрам, яку підготовил Богдан Копча. Річник як головный редактор зрыхтувал Севериян Косовскій. Заохочаме придбати публикацию, пишучы на майль: seweryjan@lem.fm.

Упамятніня в Свиднику

Свидницка Рада Міста з огляду на пандемію не орґанізувала в тым році великых упамятнінь з нагоды 76. річниці освободжыня міста через Совітску Армію. Пріматорка міста Марцела Іванчова вєдно зо своім заступником Михалом Ґоріщаком выразили в віторок, 19. січня/януара, пошану освободителям індивідуально. Як бесідувала Іванчова, памятник Совітской Арміі во Свиднику днес творит неодлучну част міста і іщы выразнійше творит символ складной воєнной істориі. Подля слів пріматоркы, памятник повязаный єст з терпіньом, болізню і стратом, а заєдно творит атмосферу тишы і миру. Іванчову занепокоює, же в сучасности вопрос войны і миру злегшат ся і баґетелизує, росне екстремізм, счезат толеранция і порозумліня. Памят павшых героів вшанували так само коло памятника в Дукли і коло памятника армадного ґенерала Людвіка Свободы.

Очыщальня в Вапенным

Ґміна Санкова реализує інвестицию, котра має за ціль змодернізувати очыщальню в Вапенным. В рамках модернізациі м.ін. збільшыт ся пропущаня до 180 м3 [кубічных метрів] на добу, выпосажыт ся очыщальню в інсталяцию до одводніня і гіґєнізациі. Кошт інвестициі то понад 1,8 мілийона зл. Роботы мали бы ся пляново закінчыти кінцьом мая 2021 р. Ґміна Санкова гевсу модернізацию веде в рамках партнерского проєкту пн. «Будова і перебудова ґрупового систему достарчаня воды і одпроваждня нечыстости Ґмін Ґорлицкой Землі». Проєкт тот єст дофінансуваный з Реґіонального Операцийного Проґраму малопольского воєвідства на рокы 2014 – 2020. Дофінансуваня то понад 80% вшыткых коштів.

В Меджелабірцях нова стация

Єдным з інвeстицийных плянів міста Меджелабірці на 2021 рік є побудувати желізницьову і автобусову стацию. Мала бы она быти на місци збуреной так званой малой желізницьовой стациі в місті. Плян будовы представило місто в першым тогорічным выданю свого періодика «Spektrum». Цілый простір буде безбарєровый, мал бы быти стацийом «модерного типу», де містило бы ся 30 осіб. В рамках проєкту з розрахунком 254 тисячы евро, на котрый самосправа достала 200 тисячы з Міністерства Інвестиций, Реґіонального Розвитку і Інформатизациі Словацкой Республикы, мают быти побудованы місця до паркуваня, забезпечены мобіляр, лавочкы, стояк на біциґлі і кошы на смітя.