Сумар дня на 21. жолтня/октобра 2022 р.

Приносиме вам сумар медияльной ґрупы ЛЕМ.фм+ на ден 21. жолтня/октобра 2022 р.

Парохіяльне свято в Команчы

Тыжен тому, 14. жолтня/октобра, проходило парохіяльне свято в православній церкви Покровы Пресвятой Богородиці в Команчы. Торжества очелювал Архієпископ Перемышльскій і Ґорлицкій Паісий, при асисті духовенства Саноцкого Деканату і зо Словациі. Підчас Літургіі возношены были молитвы за жертвы Акциі «Вісла», лаґрів в Талергофі і Явожні, бл. п. архієпископа Адама, за мир і жертвы войны на Украіні. В проповіди на конец службы владыка Паісий підкрислил неперестанну опіку над том святом земльом Божой Матери «о чым свідчыт тото, же сме, хоц мало нас не быти». Возвал до памяти о жертвах Акциі «Вісла» та будуваня будучности на фундаменті віры і культуры нашых предків.

В Креници одбыла ся конференция «Крениця Форум 2022»

Днес послідній ден Крениця Форум. Од середы – 19. жолтня/октобра, курорт был місцьом стріч лідерів світа політикы, центральой адміністрациі, територияльного самоуряду, бізнесу, наукы і медий. Проґрам конференциі «Крениця Форум 2022 – Ріст і Одбудова» порушат темы основны для розвитку Польщы і Европы, особливо трансформациі на медженародній арені і новых вызвань звязаных з тырваючом войном на Украіні, революциі, яку спричынила пандемія COVID-19, і економічного заламаня в Европейскій Уніі. Подія отримала гоноровый патронат Президента Польской Республикы. Дискусиі в рамках тридньовой подіі были поділены на пят тематичных стежок: Безпека і Ґеополітика, Економіка Зміны, Енерґія і Климат, Соспільніст Будучности та Тренды Здоровля. За Ґазетом Правном «Крениця од 100 років зараховує ся до еліты світовых курортів. Одвиджали ю европейскы підприємці, політичны лідеры, як і головы держав. Одновлена містна інфраструктура з вынятковым дептаком то єдно з найбарже престіжовых місц в Польщы до орґанізациі медженародных конференций». За орґанізатором Форум, іх цілю єст основати мультілатеральну простір до выміны знань, поглядів і досвіду – медженародне місце стріч еліт.

Популярніст біциґльового райду МНП переросла жаданя

Маґурскій Нацийональный Парк поінформувал, што заінтересуваня біциґльовым райдом «Ровером через погранича» переросло іх жаданя. Жебы взяти участ в райді, не треба ся реґіструвати, старчыт переіхати самому або в ґрупі єдном з пропонуваных трас, в терміні од 9. жолтня/октобра до 15. листопада/новембра. Першых 100 участників райду мало отримати памятковы пакєты. Як подали працівникы Парку, райд є так популярный, што выдали вшыткы пакєты уж по тыжни. В звязку з тым Парк зрыхтувал додатково нагороды потішыня для наступных 50 осіб, якы сполнят окрислены в реґуляміні вымаганя. Реґулямін найдете на інтернетовым сайті Парку.

Лемківска репрезентация в «Лемковина Ультра Трейль»

Уж заран зачнут ся тогорічны осінні змаганя в літаню «Лемковина Ультра Трейль». Подібні як в попередніх роках возме в них участ міцна репрезентация Лемків – тых жыючых на Лемковині, але і тых, якы змагати ся придут з чужыны. Лемкы выстартуют во вшыткых катеґориях бігу окрем того на 100 км, значыт будут летіти на 30, 48, 70 і 150 км. Найдолша траса веде такой через цілу Лемковину – од Крениці до Команчы, а найкоротша зачынат ся в Пулавах і кінчыт в Команчы. Заохочаме кібіцувати!