Голосник

Сумар дня на 22. червця/юнія 2020 р.

Приносиме  вам  сумар  медияльной  ґрупы  ЛЕМ.фм+  на ден 22. червця/юнія 2020 р.


А матуры фурт тырвают

В Польщы фурт проходят матуральны іспыты. Днес, згідно з польскым законодавством, Центральна Еґзамінацийна Комісия дає можніст писати матуру з лемківского языка, як єдного з меншыновых і реґіональных языків. З причыны коронавіруса іспыт може проходити лем в писемній формі. Еґзаміны з меншыновых языків каждого рока плянувано на послідній ден матур. Єднак тепер єґзамін з лемківского языка проходит перше. Другы нацийональны языкы і регіональный – кашебскій язык, буде мож здавати аж о тыжден. Перша матура з лемківского языка была здавана в Ліґници в 2013 році.

Што чути в Маґурскым Нацийональным Парку

Од суботы, 20. червця/юнія 2020 рока, обовязує нове Заряджыня Директора Маґурского Нацийонального Парку, одкликуюче заказ з 3. квітня/апріля тр. доступу до обшыри парку в туристичных і рекреацийных цілях. Діют туристичны пути і природничы стежкы. Фурт закрыты остают: Едукацийно-музейный Осередок ім. Яна Шафраньского в Крампній, видокова вежа на верху Фердель та місця, де мож палити ватры і протягом дня одпочывати. Дальше обовязуют вшыткы інчы принципы безпекы, введены властями цілю борбы з коронавірусом, тє. м.ін. обовязок тримати безпечный дистанс 2 метрів медже особами та обовязок закрывати ґамбу і ніс. Інчы заказы тыкаючы доступу до парку в цілях едукацийных, спортовых, фотоґрафуваня і фільмуваня обовязуют до одкликаня.

«Лемківскій вечер»

В найблизшу пятницю, 26. червця/юнія, в Коросні пройде концерт ансамблю Замішанці. Подія буде проходила в рамках циклю «Лемківскій вечер». Ансамбль Замішанці лучыт в своій творчости традицийны ритмы Західньой Африкы з народном музиком Замішанців, Лемків, якы давно жыли на Коросняньскій Руси. В рамках подіі буде мож попрібувати традицийне ідло Лемків і Замішанців, такє як кєселиця ци перогы. Концертови буде товаришыла выстава творів Йоанны Павловской, яка од років занимат ся олійным і акрильовым малярством. Малює лемківскы і бойківскы церкви, представлят деревяну архітектуру сел і лемківскых хыж. Єй творы стрітити мож в бєщадскых і бескідскых ґалериях. Подія буде проходила в Реставрациі Паркова 7 в Коросні 26. червця/юнія о год. 19.30. Обовязує резервация – зо взгяду на санітарны принципы чысло місц єст ограничене. Вступне 20 злотых.

Таборы для молодых одкликаны

Што рока в часі вакаций Братство Грекокатолицкой Молодежы «Сарепта» в Команчы і Новици на Лемковині веде таборы для молодых. Каждого рока берут в них участ діти і молодіж з цілой Польщы. Єднак рішыньом так кєрівників тогорічных таборів, як і членів заряду братства подіі в тым році сут одкликаны. Рішыня выникнуло в наслідстві проведеных бесід з родичами, представниками санітарных інспекций і кураторий освіты.

Увага на бурі

В цілій Польщы од парох дни проходят сильны бурі. В часі єдной з них потерпіли жытелі підґорлицкой Ропы. Перун забил місцевым ґаздам три коровы, дві з них были тювны. До поражыня звірят дошло не на паствиску, але в стайни. Властителі порахували страты на близко 18 тисячів злотых. Інчым жытелям Ропы спалила ся електроніка, зопсула ся помпа до воды. О тыжден в неділю, 28. червця/юнія, в Климківці орґанізувана буде колекта, цілю підтримати жытелів Ропы, якы потерпіли од бурі.

Шеруй.

О авторі

Ленка Стефановска

Коментарі