Сумар дня на 22. квітня/апріля 2025 р.

Приносиме вам сумар медияльной ґрупы ЛЕМ.фм+ на ден 22. квітня/апріля 2025 р.

Новый термін складаня внесків о занятя з лемківского языка

В Деннику Устав опубликували розпоряджыня Міністра Едукациі, котре змінят терміны складаня внесків о занятя для школярів нацийональных і етнічных меншын. Документ змінят розпоряджыня в справі обставин і способу выконуваня через предшколя, школы і публичны пляцівкы задач, котры уможнюют підтримуваня почутя нацийональной, етнічной і языковой достоменности учеників, котры належат до меншын. В примірі учеників, котры хотят продолжати науку меншынового языка, треба  зложыти документы до кінця марця шкільного рока, што попереджат шкільный рік, котрого має тыкати орґанізация занять. А для тых, котры зачынают науку, документ треба буде зложыти до кінця липця/юлия шкільного рока, што попереджат шкільный рік, в котрым дітина зачне вчыня. Перше внесок мож было складати до 20. вересня/септембра даного шкільного рока. Змінили ся тіж терміны резиґнациі з занять наукы меншыны. Родиче або полнолітній ученик можут зложыти одповіднє освідчыня директорови школы не пінійше як до 31. марця шкільного рока, што попереджат шкільный рік, котрого має тыкати резиґнация. В розпоряджыню зазначено, што новы переписы обовязуют уж в 2025 році і освідчыня треба зложыти не пізнійше як до 31. липця/юлия 2025 рока. Зміны мают усправнити рыхтуваня орґанізациі шкільного рока.

«Мастер і ученик»

Сут результаты Стипендияльного проґраму «Мастер і ученик». Проґрам веденый єст Нацийональным Інститутом Культуры і Спадковины Села. До проґраму зголашали ся народны творці, артисты, музикы і выробникы ручной роботы , котры під опіком мастерів хотят досконалити своі таланты. Цілю стипендияльного проґраму єст підтримувати локальны традициі і знаня та продолжати творчіст. Особливо важным аспектом єст підпора здібности загороженых втрачыньом. Того рока до конкурсовой комісиі вплинуло понад 230 внесків. Серед 27 выріжненых пар нашли ся Юлия Дошна і Івона Іскра-Криницка, з проєктом наукы лемківскых пісен. Стипендиюм отримала тіж Тереса Ортиль з мастерком Марийом Корчыньском на проєкт тыкаючый лемківской кухні.

Буд соспільным опікуном забытків, зголос ся до акциі!

Малопольскій Воєвода Кжыштоф Ян Кленчар обнял почестный патронат над акцийом промуючом ідею соспільного опікуна забытків. Цілю акциі єст заанґажувати жытелів Малопольщы до спільной опікы над перлинами реґіону. Задачом соспільного опікуна єст охорона та промуваня культуровой спадковины через ведіня загального моніторінґу, ведіня едукацийной діяльности ци спертя консерваторскых робіт. О званя опікуна забытків можут ся старати жытелі заанґажуваны в опіку над забытками, зазнайомлены з переписами што до іх охороны і реновациі. Додатковым атутом буде одповідня освіта і досвідчыня. Внесок треба кєрувати до Воєвідского Консерватора Забытків, разом з окрислиньом повіту, де ведена буде діяльніст. Опіка культуровой спадковины то не лем чест, але тіж реальный вклад в будуче спільноты. Орґанізатором акциі «Буд соспільным опікуном забытків» єст Комітет Охороны Забытків і Культурных Цінности.

«Łemkowszczyzna – Лемковина» – нова одслона

В Катовицях в Ґалериі 5 Міста Загорід мож видіти дальшу одслону медженародного артистично-наукового проєкту «Łemkowszczyzna – Лемковина». Цілю проєкту єст промоция культуровой і історичной спадковины та вказаня краєвидів з польско-словацкого погранича. В проєкті участ бере 50 артистів з Польщы, Бельґіі, Украіны, Німец, Франциі, ЗША і Тунезиі. Выставу мож буде обзерати в Катовицях до 18. мая.