Приносиме вам сумар медияльной ґрупы ЛЕМ.фм+ на ден 22. липця/юлия
2020 р.
Ніль Юрий Лущак остал апостольскым адміністратором Мукачівской Грекокатолицкой Єпархіі
Порталь Vatican News поінформувал, што папа римскій Франциск призначыл владыку Ніля Лущака, помічного єпископа Мукачівской Грекокатолицкой Єпархіі, за апостольского адміністратора єпархіі до одкликаня Святым Престолом. Владыка Ніль был выменуваный за адміністратора єпархіі по смерти єпархіяльного єпископа – владыку Мілана Шашіка, котрый перед тыжньом – 14. липця/юлия, несподівано вмер. Ніль Юрий Лущак з Чыну Меншых Братів Францисканів вродил ся 22. мая 1973 рока в Ужгороді. Теолоґічну і духовну формацию здобыл там же і в 1996 році был рукоположеный на священника. Студиювал філософію на Папскым Урбаняньскым Університеті в Римі, пак сам зачал выкладати філософію на Ужгородскій Грекокатолицкій Духовній Академіі ім. Теодора Ромжы. За помічного єпископа Мукачівской Грекокатолицкой Єпархіі был выменуваный папом римскым Венедитком XVI в листопаді/новембрі 2012, а рукоположеный на єпископа в січни/януарі 2013 рока.
«Мушына-Чырч, сохранме перед забытьом культуру нашых предків»
В селі Чырч одновлят історичну, близко сторічну, деревяну русиньску хыжу. Реконструкция хыжы пройде в рамках мікропроєкту «Мушына-Чырч, сохранме перед забытьом культуру нашых предків». З польской стороны одновлят храм. Чырч на проєкт здобыл 70 тис. евро. Думка выремонтувати стару хыжу зродила ся медже жытелями села, котры хотіли єй сохранити. Властитель хыжы передал будинок на власніст селу, зорґанізуют гын і ізбу памяти. Роботы при хыжы реалізує сельска фірма Солиско Чырч. Найперше вымінена буде стара стріха на новый ґонт, вымінена буде і підлога ци перегородкы, котрым роками шкодила спідня вода. Староста села Михал Дідик підкрислил, што вшытко ся робит в згоді з одказом предків.
Десяткы туристів в першый вікенд одкрытя видоковой вежы в Чорноріках
17. липця/юлия одкрыли видокову вежу в Чорноріках, єдным зо сел Коросняньской Руси. Хоц на верху горы од вельох років функцийонувал видоковый пункт, то в минулый вікенд можливіст додатково войти на вежу притягнула десяткы туристів. З 13-метровой вежы видно велику обшыр м.ін. середньой Лемковины. Конструкция вежы є бетонова, по части обложена каменьом, а ціліст вінчыт деревяный дах. До входу веде велика деревяна брама, а докола вежы вызначено пляц з місцями до сіджыня під задашыньом. Найбільшом атракцийом вежы є видоковый тарас, якій находит ся на высокости коло 10 метрів, ведут до него сходы в середині будинку. З тарасу обзерати мож Стрижівско-Динівскє Погіря і Низкій Бескід. При добрій хвили видно тіж Бєщады та Татры. При вежы єст лем 10 місц до паркуваня авта, зато власти ґміны рекомендуют, жебы авта лишати на паркінґу коло церкви в Чорноріках, а до вежы іти піше. Вежа отворена є 7 дни в тыжни в годинах од 8.00 до 20.00. На партері і першым плянтрі находят ся поміщыня до орґанізациі выстав.
Вакацийно-осінні ініциятивы в Команчы
Неодолга рушат ініциятивы реалізуваны в рамках проєкту пн. «Віртуальна Команча – шляком деревяной архітектуры, крестів і капличок». Проґрам задачы обнимат: реновацийно-модернізацийны варштаты выбраных придорожных крестів і капличок, опрацуваня інформацийно-промоцийных материялів на основі старых фотоґрафій, конкурсы: мануально-плястичный, вокально-музичный і літературный та віртуальну прогульку шляком деревяной архітектуры, крестів і капличок в ґміні Команча. Реалізатором проєкту є Стоваришыня Підпоры Локальных Ініциятив Команчы Вільк. Проєкт будут реалізувати до кінця грудня/децембра тр.
Коментарі