Сумар дня на 22. лютого/фебруара 2022 р.

Приносиме вам сумар медияльной ґрупы ЛЕМ.фм+ на ден 22. лютого/фебруара 2022 р.

Медженародный Ден Материньского Языка

Вчера, 21. лютого/фебруара, был святкуваный Медженародный Ден Материньского Языка. Ден тот выголосила 30. Ґенеральна Конференция Орґанізациі Зъєднаных Наций про выхованя, науку і культуру (UNESCO) в листопаді/новембрі 1999 рока. Міністерство Культуры Словацкой Республикы написало на своім фейсбуковым сайті, же є то добра нагода, жебы звекшыти свідоміст о роли, котру материньскій язык має при освіті, формуваню і ідентичности особы, але і при сохраніню нематерияльной культуровой дідовизны. Міністерство одкликало ся і на резултаты минулорічного списуваня жытелів, з котрых вышло, же окрем словацкого громадяне Словациі голосят ся ґу дальшым 25 материньскым языкам. Припомнийме, же подля зобраных даных русиньскій язык єст четвертый найвекшый на Словациі. Як пише ресорт культуры, і тото чысло сиґнализує потребу припоминати незаступну ролю материньского языка в жытю чловека. Припомнули, же чысло языків на світі неперестанно ся зменшат, што єст спричынене тиском векшых, міцнійшых языків на меншы языкы. За міністерством, каждый язык обсягує ориґінальный спосіб думаня, а богатство тото мож сохранити лем товды, покля малы языкы будут цінены єднако як великы.

На конференциі підсумували проєкт ревітализациі деревяных церкви

В звязку з завершыньом проєкту Операцийного Проґраму Інфраструктура і Середовиско пн. «Східньославяньска Культурова Дідовизна – консервация, реновация і діґітализация деревяных церкви і іх выпосажыня в Малопольщы, на Підкарпатю, Любельщыні і Підляшы» одбыла ся підсумувуюча проєкт конфереция в Люблині. Як повіл на ній віцеміністер культуры і нацийональной спадковины Ярослав Селлін, безцінны забыткы церковной архітектуры сут материяльным проявом східньославяньской культуры на польскых землях. Тоты забытковы творы православя остают в теперішнім жытю жывым свідоцтвом вельовіковой традициі. Проєкт был дофінансуваный з Европейского Фонду Реґінального Розвитку середками в высокости понад 22,6 млн злотых. В його рамках ремонтуваных было 19 церкви в 17 місцевостях. Серед ревітализуваных обєктів нашли ся і церкви на Лемковині – в Волівци, Конечній, Розділю, Кунковій і Высовій.

Новый номер «Річника Руской Бурсы»

Кінцьом 2021 р. явил ся дальшый номер «Річника Руской Бурсы». То єдиный науковый лемківскій періодик, якій выдаваный єст Стоваришыньом «Руска Бурса» в Ґорлицях од 2005 рока. Находит ся він на списку науковых часописів пунктуваных Міністром Едукациі і Наукы. Головном темом сімнадцетого чысла «Річника Руской Бурсы» єст лемківскій/русиньскій простір. Як подає в вводным слові редакторка выданя, проф. О. Дуць-Файфер, статі поміщены в сесым чыслі «Річника», што тыкают той темы, односят ся до ріжных аспектів розпознаваня, знакуваня, дискурсу, діянь, стратеґій, творіня простору і в просторі. Публикацию можете придбати в інтернетовым склепі нашого порталю.

Ґорлицкій Центр Культуры буде ремонтуваный

В минулу пятницю явила ся інформация, же місто Ґорлиці выбрало в конкурсі оферт выконавцю, котрый зревітализує Ґорлицкій Центр Культуры. Не был то першый конкурс оферт на ремонт будинку. Попередні конкурсы были анулюваны, кєд же оферты не містили ся в плянуваным буджеті. Бургомайстер Ґорлиц Рафал Кукля мал надію змістити ся в квоті кус понад 6 млн злотых. І тым разом не повело ся змістити в буджеті і на ремонт будинку місто презначыт близко 13 млн злотых.