Сумар дня на 22. марця 2024 р.

Приносиме вам сумар медияльной ґрупы ЛЕМ.фм+ на ден 22. марця 2024 р.

Першый крок ґу вызнаню вілямівского за реґіональный язык

В минулу середу 20. марця засідала Соймова Комісия Нацийональных і Етнічных Меншын. Головным пунктом засіданя было розсмотріня внеску Президиі Комісиі о піднятя законодавчой ініциятивы в справі новелизациі закону о нацийональных і етнічных меншынах та реґіональным языку, в обшыри вызнаня вілямівского языка за реґіональный язык. Борба о вызнаня вілямівского языка тырват уж понад 10 років. Векшына членів комісиі по дискусиі поперла внесок президиі. Проєкт буде зложеный в маршалка Сойму. Вкаже він комісию, котра буде над ним працувала. Ведуча комісиі Ванда Новіцка выразила надію, же вписаня вілямівского до закону спричынит, же буде «розвиваный і не трафит до языків, котры вымерли». Як подала, «то важный крок в вызнаню богатства культуры і будуваня соспільства, котре шанує ріжнорідніст і языкову і етнічну вельокультуровіст. А предовшыткым дотримуваня польского права в обшыри прав меншын, медженародных стандардів і прав чловека в Польщы».

Перше засіданя нацийонального Выбору з новым уповномічненым

Так само в середу 20. марця в Братиславі прошло 52. засіданя Выбору про нацийональны меншыны і етнічны ґрупы Рады Влады Словацкой Республикы про людскы права, нацийоналны меншыны і родову рівніст. Нацийональный выбор першыраз засідал з новым председом, полномічным влады СР про нацийональны меншыны Акошом Гороньом. Новый полномічный представил на засіданю візию свойой роботы, вызвал представників меншын, жебы звертали ся до нього при рішаню своіх проблемів, а так само, жебы кликали го на своі подіі, бо хоче познати жытя вшыткых нацийональных меншын. На засіданю зас бесідувало ся і о Фонді на підпору культуры нацийональных меншын. Русиньска меншына, так як в попередніх роках, вырішыла мати єдну фахову раду, котра оцінює вшыткы три обшыри підпорюваной культуры. На засіданю были порушены і такы проблемы як актуальный стан хоснуваня языків нацийональных меншын ци мешынове высыланя. Веце на тоту тему найдете в дописі на нашым портали.

Старый цмонтір в Зубеньску переданый для ґміны Команьча

Ґміна Команча поінформувала, што в понедільок 18. марця тр. был підписаный нотарияльный акт на пошыріня цмонтеря в Зубеньску. Акт был підписаный медже Польском Фундацийом Охороны Дикых Звірят і ґміном Команча, в імени якой діє Війт Ґміны Команча. Документ был підписаный при присутности представників Стоваришыня Опікуны Бєщадской Істориі, котры од долшого часу старали ся о безплатне переданя цмонтеря для локальной соспільности. Фундация дармо передала права власности нерухомости означеной як ділянка нр 20/9 в Зубеньску для ґміны Команча. Нерухоміст разом з ґмінном ділянком нр. 19 в Зубеньску становит грекокатолицкій цмонтір з другой половины ХІХ ст., котрый єст вписаный до ґмінной евіденциі забытків.

В Польковицях одкрыли Порадню для Жен

Модерна і професийональні выпосажена Порадня для Жен в Польковицкым Центрі Здравотных Услуг была офіцияльно оддана до хоснуваня. Місце было творене з думком о женах і для жен. Находят ся там лікарскы ґабінеты, працовня кардийотокоґрафіі, ци школа роджыня. Як підкрислил бургомайстер Польковиц Лукаш Пузнєцкій, то черговый етап модернізациі польковицого центра. Недавно оддана до хоснуваня была працовня компутеровой томоґрафіі. Ремонт порадні тырвал два рокы і коштувал близко 2,5 млн злотых.

Джерело фотоґрафіі: Стоваришыня Вілямівяне / Stowarzyszenie Wilamowianie