Сумар дня на 22. мая 2026 р.

Приносиме вам сумар медияльной ґрупы ЛЕМ.фм+ на ден 22. мая 2026 р.

13. Медженародне Бієнале Лемківской / Русиньской Культуры

Уж заран в Креници зачне ся РутенАле – 13. Медженародне Бієнале Лемківской / Русиньской Культуры. Того рока першыраз другій ден подіі пройде в Высовій. На Бієнале все презентуют ся лемкіскы/русиньскы творці з Польшы і заграниці. Того рока выступлят русиньскы артисты з: Польщы, Словациі, Украіны, Румуніі, Мадяр, Хорвациі і Сербіі. На початку, в суботу рано, пройде засіданя Світовой Рады Русинів. Пак в само полудне на старым креницкым цмонтері одправлена буде панахіда на гробі Епіфана Дровняка – Никыфоря. Дальше зложене буде квітя під памятником артисты на Бульварах Дітля. Одтамале перейде хоровід до Старого Здравичного Дому на Креницкым Дептаку, де о 15:00 год. в бальовій сали одкрыты будут выставы малюнку, ікон і фотоґрафій. Там тіж пройдут пак два концерты. В першым, інавґурацийным концерті о год. 15:30 запрезентуют ся Терочка з Ґорлииц, Дружство Руснак з Хорвациі, Студенка з Украіны і Ластівочка з Пшемкова. В вечернім концерті о 19.00 год. выступлят Ластівочка, Усе так не буде з Украіны, Сестры Угляровы зо Словациі і Лада з Кракова. Другій ден Бієнале зачне ся в неділю о год. 13:30 зложыньом квітя при памятнику в Устю Рускым. Пак подія перенесе ся до амфітеатру в Высовій, де о год. 14:30 буде мож выслухати прелекцию о русиньскій культурі. О 15:00 год. одбуде ся там фіналовый концерт, в котрым выступлят Ластівочка, Лада, Студенка і Заруба зо Словациі. Вступне на вшыткы подіі дармо.

Ближыт ся 29. річник Фестівалю ”Світ під Кычером”

О кус понад місяц рушыт чергова, 29. едиция Медженародного Фольклористичного Фестівалю ”Світ під Кычером”. Тогорічный Фестіваль пройде в днях од 25. червця/юнія до 6. липця/юлия. Концерты одбудут ся в 11 місцевостях Нижнього Шлеска: Ґурі, Ліґници, Лісци, Ліґницкым Поли, Олесници, Поляниці-Здруй, Шпротаві, Польковицях, Рудній, Заменицях і Желішові. Запрезентуют ся на них ансаблі з Чіле, Чешской Республикы, Еквадору, Ґамбіі, Індиі, Мексику, Польщы, Румуніі, Украіны і Сенеґалю. Вшыткы подіі сут безплатны. Припомнийме, што ”Світ під Кычером” был уж трикратно вызнаный FIDAF за найліпшый фольклористичный фестіваль на світі.

”Краєвид з близном” – прелекция попри выставі «Прикликаня. Лемковина в діалоґу штукы і поколінь»

Днес о 19.00 год. в Воєвідскым Домі Культуры в Ряшові Анджей Жыґадло, артиста і консерватор творів штукы, дослідник польско-украіньско-лемківского погранича і церковной архітектуры полудньово-східньой Польщы, выголосит прелекцию з назвом ”Краєвид з близном”. Подія товаришыт выставі малярства Барбары Губерт і Марты Криницкой-Ожех пн. «Прикликаня. Лемковина в діалоґу штукы і поколінь». Вступне на подію дармо.

GOPR остерігат перед бурями в горах

GOPR остерігат туристів перед бурями в горах. Не лем прогулька в высокых Татрах, але і в Бескідах повинна ся зачати од провіріня актуальной проґнозы погоды і комунікатів з остережынями. Треба тіж так заплянувати трасу, жебы мочы як найскорше зыйти з гірскых гырбетів долов. Збераючы ся темны хмары, міцнійшый вітер, або хвильова студенійша температура сут сиґналом ближучых ся атмосферичных выладувань. GOPR рекомендує в сутуациі загорожыня уникати дерев, маштів, скал, метальовых елементів і потоків. Треба тіж памятати, жебы вчас бурі одложыти трекінґовы кыйкы. В критичній ситуациі треба куцнути на наплечнику, котрый ізолює од землі і як найнизше сховати голову. В минулым тыжни до барз небезпечной ситуациі дошло в Татрах – перун разил там аж 7 осіб.