Сумар дня на 22. вересня/септембра 2021 р.

Приносиме вам сумар медияльной ґрупы ЛЕМ.фм+ на ден 22. вересня/септембра 2021 р.

Памят про зло войны

В минулу суботу, 19. вересня/септембра, в Калинові споминали высвободжыня того села, як першого, спід влияня нацистовскых Німец. По тяжкых боях Червена Армія освободила Калинів в окресі Меджелабірці 77 років тому. Пропамятны подіі проходят в тым русиньскым селі каждого рока. Як підкрислил шолтыс села, Іван Сивак, робит ся тото зато, жебы молода ґенерация николи не забыла про ґеєнну, яку несе зо собом война. В рамках святкувань річниці одправлена была панихіда за павшых вояків коло Памятника Освободжыня, пак положыли ся вінці, голос забрали і гості. Над селом перелетіли гелікоптеры UH-60M Black Hawk і Mi-17, участникы могли тіж выслухати концерт Воєньской музикы Баньска Быстриця.

В Загороді дальшы стрічы

25. і 26. вересня/септембра в Мазярскій Загороді в Лоси пройдут дві стрічы орґанізуваны Стоваришыньом Civitas Nostra в рамках проєкту пн. «Спадковина Низкого Бескіду вчера а днес». На першій з них омовлят архітектуру Низкого Бескіду на примірі Мазярской Загороды, друга тыкала буде жытя в хыжы. Буде бесіда про штоденніст, звикы і традициі Лемків. Початок обох стріч о 16.00 год. Вступне дармо. Проєкт дофінансувано в рамках проґраму Нацийонального Інституту Спадковины – Спільні для Спадковины.

«Пересвітліня» з Лемковины

Од початку будучого тыжня аж до 23. жолтня/октобра в ґалериі «na6» в Ґливицях буде мож видіти выставу фотоґрафіі Алициі Пшыбышовской пн. «Пересвітліня». Є то особиста візия Лемковины фотоґрафкы. Фотоґрамы роблены Пшыбышовском сут зложеныма композициями з вельоелементовом наррацийом. Цілю фотоґрафкы є вказати Низкій Бескід подля того, як она го одберат і чує, і передати енерґію місц, люди, традиций і символів. Авторка походит в Нового Санча, де фурт жыє і одкале бере інспірациі до творчости. Студентка Акадаеміі Красных Штук во Вроцлаві. Занимат ся концептуальном фотоґрафійом, шыроко понятым краєвидом, социйолоґічном і подорожничом фотоґрафійом. Пшыбышовска є авторком 15 індивідуальных і парудесятьох колективных выстав.

Увага на вакцину!

Од пятниці, 24. вересня/септембра, до 1. жолтня/октобра потырват в цілій Малопольщы акция подаваня вакцины проти встеклині лишкам, якы жыют на свободі. Вакцина буде розмітувана з аероплянів і розкладана ручні. Воєвідскій ветеринарийный інспекторат апелює, жебы в тым часі не пущати псів ани котів, а вчас прогульок псы вести найліпше на мотузах і в намордниках. В примірі контакту домашніх звірят з вакцином треба зголосити ся до дохторя ветеринариі. Не мож тіж самому дотыкати, підносити ани розламувати вакцину.