Сумар дня на 22. вересня/септембра 2022 р.

Приносиме вам сумар медияльной ґрупы ЛЕМ.фм+ на ден 22. вересня/септембра 2022 р.

Вмер творця технолоґіі LED, Русин Нік Голоняк

Як інформувал порталь Illinois News Bureau, 18. вересня/септембра 2022 р. вмер в місті Урбана, в штаті Іллінойс (ЗША) Нік Голоняк. Был то професор Університету в Іллінойс. Вмер в віку 93 років. Голоняк был вызначным вченым, котрому завдячаме технолоґію LED. Покійный был сыном русиньскых еміґрантів з Підкарпатя. Сам ґу тому приголосил ся наприклад при інтервю, котре дал для порталю Engineering and Technology History Wiki. Нік Голоняк вродил ся 3. листопада/новембра 1928 р. в місті Зіґлер, Іллінойс. В 1960 р. створил першу ласерну діоду, о два рокы пізнійше першу LED – світло емітуюче діоду, уж як консультант General Electric. В 1963 р. вернул на Alma Mater, але уж як професор, і робил на квантовій теориі волны і на ласері. В 1989 р. был одзначеный Едісоновым Медальом. Пак был іщы вельократно нагороджуваный. Голоняк перед роками споминал на тото, што його родиче были Карпатскыма Русинами, якы бесідували дома в рідным языку.

Просиме на Высоку. Буде лемківскє музикуваня

Припоминаме, што уж в найблизшу суботу, 24. вересня/септембра, на Высокій коло Рудной одбуде ся концерт пн. «Лемківскє співаня». Подія зачне ся о 15.00 год. В проґрамі выступы такых ансамблів як Розтока, Кычерка, Осетнополяне, Сасанка, Дамир і Надія. Забаву під конец дня заграт ґрупа Вороны. Вчас подіі буде мож посмакувати традицийну лемківску і ґрузиньску кухню. Буде тіж зорґанізувана выстава традицийного лемківского облечыня. Высока то село на Нижнім Шлеску, в котрым по 1947 р. прожыват вельо лемківскых родин, выгнаных м.ін. з Боґушы.

В Климківці видно косты нашых предків…

Смутны річы діют ся в остатніх днях на обшыри штучного заливу Климківка, якій был створеный в місци давного лемківского села під таком самом назвом. Од парох днів поліция забезпечат місце, де колиси находил ся памятковый лемківскій цмонтір. З огляду на низкій рівен воды, на порожніх просторах зачали являти ся людскы кости. В віторок Прокуратура з Ґорлиц забезпечыла найдены кости, якы будут збаданы, головно зато, жебы провірити, ци походят з давного лемківского цмонтеря. Ґміна Ропа інформувала, што коли резервуар был орґанізуваный, была нанята фірма, яка мала зробити ексгумацию. Быти може ексгумация з 1994 р. была зроблена недостаточно докладні. Заєдно поліция і прокуратура глядают тых, якы правдоподібно зачали розкопувати тото, што остало ся по бывшым цмонтери. Доказом того сут м.ін. розкопаны гробы, де видно кости, і останкы памятників.

В суботу шаховый турнір в Ґорлицях

Як інформує православна парохія Святой Тройці в Ґорлицях, уж в найблизшу суботу, 24. вересня/септембра, одбуде ся дальшый шаховый турнір, до участи в котрым прошены сут вшыткы охочы. Подія одбуде ся в рамках XVII Екуменічной Спортовой Олимпіяды «Єдніст в спорті». Вшыткы змаганя будут проходити на обшыри Осередка Правосланой Культуры Ельпіс в Ґорлицях, якій містит ся при тамтышній церкви (ул. св. Максима Ґорлицкого 2). Змаганя зачнут ся з самого рана, о 9.00 год. Одбудут ся в трьох віковых катеґориях – од наймолодшых (до 10 років), через середній вік (до 16 років) і народжены в 2005 р. або перше. Вступне дармо, а записы будут в ден початку змагань, од год. 8.30.