Сумар дня на 23. грудня/децембра 2021 р.

Приносиме вам сумар медияльной ґрупы ЛЕМ.фм+ на ден 23. грудня/децембра 2021 р.

Словация уж штоси знає. А што зо списом в Польщы?

На Словациі жыє 5 449 270 жытелів. З цілковитого чысла жытелів є 49% мужчын і 51% жен. Такы чысла выходят з першых основных результатів тогорічного Списуваня Жытелів, Домів і Мешкань 2021. Даны о членах нацийональных меншын на Словациі ци о реліґійній приналежности не сут покля што публикуваны. Результаты словацкого спису потвердили тренд, же населіня старіє. Окрем того, аж 98,9% жытелів з тырвалым перебываньом на Словациі то громадяне Словацкой Республикы. З першых результатів знаме і то, же кус веце жытелів, конкретно 53,2%, жыє в містах, 46,8% населіня жыє на селах. Вшыткы дотеперішні статистичны даны сут доступны на вебсайті www.scitanie.sk. В січни/януарі мали бы быти публикуваны дальшы даны. Покля што не знатя докладні, коли першы даны зо спису, а головно тоты про нацийональны меншыны оголосит польскій Головный Статистичный Уряд.

Скінчыл ремонт ул. Дукляньской в Ґорлицях

При ул. Дукляньскій в Ґорлицях завершыли ся роботы повязаны з передубовом воєвідской дорогы но. 993 і зрыхтуваньом інфраструктуры під будову цмонтеря. Пошырена была сама дорога тa перебудувана была крижівка. Добудували і дальшу част пішо-біциґльовой стежкы, яка доходит до ул. Луковой. Побудували і новый пристанок. В попереднім етапі ремонту было поставлене нове освітліня, побудувана была біциґльова стежка (першый одтинок) та досвітлено перехід для пішых. Ґорлиці дофінансуваня на вшыткы етапы отримали з Заряду Малопольского Воєвідства в трибі Самоурядовых Ініциятив, в высокости 50% коштів.

Фурт збераме на кухарску книжку

Припоминаме, што до кінця грудня/децембра тр. тырват соспільна колекта на печатаня першой лемківской кухарской книжкы. В публикациі найде ся яж 70 провіреных ориґінальных рецептур. Каждый, хто хоче мати примірник книжкы, може зробити передплату в соспільній кампаніі збераня грошы на выпродукуваня книжкы на сайті zrzutka.pl. Колекту глядайте під назвом: Łemkowskie smaki – wydanie książki kucharskiej.

Христос Раждаєт ся! – тепер святкуючым

А на конец днешніх новин хочеме передати святочны желаня вшыткым тепер празднуючым. За григорияньскым календарьом заран выпадат ден велиі Рождества Христового, святкуваного окрем християн західньой традициі і вірныма дакотрых східніх Церкви, котры ідут за новым стильом. Зато вшыткым слухачам, любителям радия, котры святкуют Різдво уж тепер, желаме вшыткого доброго і предовшыткым смачной велиі при родинным столі. В нашым радию од заране будете мочы чути колядкы і святочны авдициі. Желаня передає ансамбль медияльной ґрупы ЛЕМ.фм+ та члены Стоваришыня «Руска Бурса» в Ґорлицях. Христос ся Раждає!