Сумар дня на 23. липця/юлия 2021 р.

Приносиме вам сумар медияльной ґрупы ЛЕМ.фм+ на ден 23. липця/юлия 2021 р.

Полномічный влады СР про нацийональны меншыны поглублят спілпрацу з Радом Европы

Полномічный влады Словацкой Республикы про нацийональны меншыны Ласло Буковскій принял в середу, 21. липця/юлия, Оксану Томову, надзвычайного і уполноміченого посла Словацкой Республикы і постійного представника Словацкой Республикы при Раді Европы. Стріча з Томовом замірена была на укріпліня спілпрацы при просаджуваню меншыновых прав. В результаті стрічы зрыхтуваны будут меншыновы языковы версиі підручників о карті меншыновых языків, якы пак будут опубликуваны на вебсайті Рады Европы і уполномічненого. Порушена была тіж тема фонду, з котрого меншыновы орґанізациі і самосправы могли бы фінансувати аплікацию языковых прав.

Зміны в словацкым Фонді на Підпору Культуры Нацийональных Меншын

Од серпня/авґуста тр. входят зміны в словацкым Фонді на Підпору Культуры Нацийональных Меншын. Причыном єст принята парляментом новелизация закону о Фонді, підписана президентком Словацкой Республикы Зузаном Чапутовом в минулу середу. В законі уточнили дефініцию культурной орґанізациі нацийональной меншыны, як і евіденциі культурных орґанізаций, котры будут обсягувати даны о культурных орґанізациях, котры можут брати участ в выбераню і воліню кандидатів на членів фаховых рад. Представника на волебну громаду меншыны буде могла пропонувати лем орґанізация, котра сполнят вымогы і є записана в евіденциі, і яка розвиват активну діяльніст в обшыри свого діяня. Інчом зміном єст влучыня медже культурны орґанізациі нацийональных меншын окрем мимовласных безпрофітовых орґанізаций церкви, реліґійных спільнот і правных осіб, котры мают свою правну підметовіст од церкви або реліґійной спільноты, як і орґанізацийных єдиниц публичных стоваришынь з окремом правном підметовістю.

На Выжнім Шлеску одкрыли Шлезску Амбасаду

Од минулого понеділька в Нікішовци на Выжнім Шлеску діє Шлезска Амбасада. Одкрыл ю европосол Лукаш Когут. За «Ґазетом Выборчом», бюро має быти місцьом стріч вельох ріжных середовиск, головні шлезскых, де могли бы быти ведены дискусиі о важных для Шлеска справах, м.ін. спільной політичной репрезентациі в соймику воєвідства ци вызнаню шлезского языка. Важна єст не лем політика, але і штоденны справы. Працівникы бюра уж тепер помагают Шлезакам – не лем в Нікішовци – выполняти формулярі повселюдного спису. Як бесідує Когут, вельо з них хоче задеклярувати шлезску нацийональніст, але не єст то легко зробити. Европосол запевнят, же його бюро буде одкрыте для вшыткых, котры хотят діяти на хосен Шлеска і локальной соспільности. Не заперают ся лем на шлезскы справы. В амбасаді поміщено дотля фаны шлезску, европейску і Заґлембя.

«Вандруюче літо» з Маґурскым Нацийональным Парком

Маґурскій Нацийональный Парк просит діти і родины на вакацийны стрічы. В тым році не будут они стацийонарны, але будут ся одбывати в ріжных місцях Парку. Працівникы Парку просят до спільной природничой прогулькы шляками Маґурского Нацийонального Парку і познаваня окружаючой нас природы. Інформациі про стрічы будут публикуваны в каждый понедільок на фейсбуковій страні подіі Парку пн. «Вандруюче літо». Сама прогулька буде проходила в кажду середу о 10.00 годині. На стрічы обовязуют записы, найпізнійше ден перед плянуваныма занятями. Участ в прогульках єст безплатна.