Приносиме вам сумар медияльной ґрупы ЛЕМ.фм+ на ден 23. листопада/новембра 2020 р.
Зміны в ограничынях спричыненых пандемійом
В суботу, 21. листопада/новембра, премєр Польской Республикы Матеуш Моравєцкій передал новы рішыня ураду, тыкаючы ограничынь введеных цілю борбы з пандемійом коронавіруса. Од 7. листопада/новембра обовязує в цілій державі другій, найвысшый рівен ограничынь. В його рамках вчыня в школах проходит лем в формі на дистанс, закрыты сут культурны інституциі. Заказ тыкат і діяня ґастрономічных локалів, ци пунктів фітнес. В гандльовых центрах закрытых єст тіж більшіст склепів. Має ся тото змінити од наступной суботы, 28. листопада новембра. Од того дня зас будут одкрыты гандльовы центры. Як заповіл премєр, кєд ся не будут стосувати до санітарного режіму, будут запераны. Ґастрономічны локалі, інституциі культуры і пункты фітнес будут іщы закрыты мінімально до 27. грудня/децембра. Так само закрыты остают школы, до 23.-24. грудня/децембра. Зимовы вакациі сут вызначены на період од 4. до 17.-18. січня/януара 2021 р. для цілой державы. Польскій премєр апелювал тіж ограничыти переміщаня ся медже містами і стрічы в святочным періоді.
Засіданя Комісиі Нацийональных і Етнічных Меншын
18. листопада/новембра прошло соймове засіданя Комісиі Нацийональных і Етнічных Меншын. Вчас засіданя віцеміністер Блажей Побожый представил інформацию Міністра Внутрішніх Справ і Адміністрациі тыкаючу діяльности Спільной Комісиі Уряду та Нацийональных і Етнічных Меншын. В склад Комісиі входят представникы 14 орґанів урядовой адміністрациі та 21 членів репрезентуючых нацийональны і етнічны меншыны та соспільніст бесідуючу в реґіональным языку. На стрічы віцеміністер Побожый підкрислил, што в Польщы коеґзистуют ріжны нацийональности, традициі і языкы, а Польска Республика намагат ся творити найліпшы обставины жытя і розвитку нацийональных і етнічных меншын та соспільности бесідуючой в кашебскым языку. Додал, што тішат ся з громадяньского заанґажуваня і вкладу соспільности в успішный розвиток державы. Віцеміністер підкрлислил, што комісия занимат ся вельома справами. Ведучыма темами засідань были дотепер м.ін. участ нацийональных і етнічных меншын в публичным жытю, оцініня ситуациі нацийональных і етнічных меншын в воєвідствах, ци фунґуваня меншыновых орґанізаций в часі пандеміі. Комісия занимат ся і фондами передаваныма цілю підтримувати культурову достоменніст нацийональных і етнічных меншын і реґіональный язык.
Новый фраґмент дорогы S3 одкрытый
В пятницю, 20. листопада/новембра, Ґенеральна Дирекция Державных Доріг і Автострад одкрыла наступне 6 км нового фраґменту дорогы S3 з Любіна до Польковиц. Нова дорога має три смугы руху і єдну аварийну. Іхаючы в обі стороны мают хоснувати дві зовнішні смугы, а тота посередині буде полнила розділяючу функцию. На дальшым одтинку дорогы од крижівкы Любін Пілнич до крижівкы Казьмєрів фурт ведены сут роботы – мостовы, бранжовы і при кладіню верхньой верствы. Завершыня робіт єст плянуване на II квартал 2020 рока.
Презентация моноґрафіі пн. «Істория Русинів на Спишы»
В середу, 25. листопада/новембра, о 16.00 год. пройде в рамках циклю «Дворны діалоґы» святочна презентация двоязычной словацко-русиньской моноґрафіі пн. «Істория Русинів на Спишы», котру печатал Музей Спиша в Спишскій Новій Веси. З причыны введеных ограничынь звязаных з пошырюючом ся пандеміі презентация пройде в віртуальным просторі. Як поінформувала директорка музею Зузана Кремпаска, обзераючы не будут мати на жаль можливости видіти одкрытой 17. вересня/септембра выставы пн. «Русины на Спишы». Выстава подля Кремпаской презентує русиньску меншыну як жыву, котра збогачує і днес свойом історийом, культуром, реліґійом, звыками, традициями і ремеслом. Музей в рамках выставы зрыхтувал і інчы подіі, в тым примірно фільм о Русинах, ци Ден Русинів 12. червця/юнія 2021 рока. Найвызначнійшом, ведучом подійом выставы є презентация книжкы авторства робітників Музею Спиша, пн. «Історія Русинів на Спишы», котра обнимат і вельо дотля непубликуваных фактів. «Істория Русинів на Спишы» є першым томом едициі музею пн. «Істория нацийональности на Спишы». Мотузок до подіі найдете на нашым інтернетовым портали.
Коментарі