Приносиме вам сумар медияльной ґрупы ЛЕМ.фм+ на ден 23. лютого/фебруара 2023 р.
Просиме до Музею Русиньской Культуры в Пряшові
Днес в Музею Русиньской Культуры в Пряшові проходит бесіда о ревітализациі меншыновых культур в Польщы, на Словациі і во світі, в тым русиньской культуры. Дискутувати будут проф. Олена Дуць-Файфер і проф. Ева Міхна з Ягайлоньского Університету та проф. Томаш Віхеркєвич з Університету Адама Міцкєвича в Познані. Дослідникы наштоден заанґажываны сут в ревітализацийны проєкты або в баданя меншыновых культур. Стріча проходит од 16.00 год.
Молоды Лемкы в фіналі православной Олимпіяды
8. лютого/фебруара проходил ІІ етап елімінаций до Загальнопольской Православной Олимпіяды Реліґійного Знаня. Єден з такых конкурсовых етапів проходил при православній парохіі св. Тройці в Любіні. Участ в тогірічній едциі подіі берут ученикы Меджешкільного Катехетичного Пункту в Любіні – Наталия Шпытко і Михал Репела, ученикы І Ліцею ім. Коперніка в Любіні. Тогорічна тема змагань то «Сучасне православне монашество в Польщы». Другій етап округового конкурсу позитивно перешли як раз Наталия Шпытко і Михал Репела, якы возмут участ в третім і остатнім етапі, котрый одбуде ся в днях 9.-10. марця в Білымстоку. Елімінациі ІІІ ступени будут складати ся з двох части: тесту і бесідуваной одповіди. Олимпіяда має акредитацию Міністра Нацийональной Едукациі, а орґанізатором єст Катедра Православной Теолоґіі Університету в Білымстоку.
ПСК старат ся о мосты
Справуваня і Утримуваня Доріг Пряшівского Самосправного Краю плянує в тым році більше як 1500 разів сконтролювати мосты, в тым буде звычайна і головна контроля. В рамках свойой діяльности крайска фірма робит і міморядны контролі мостів. Цілю є предовшыткым здобыти інформациі о технічным стані обєктів. На основі оціны з контролі пак планує ся іх направа, модернізация, припадно ся зробит ограничыня руху на ним або запре цілковито. ПСК диспонує найвешком сітю мостів спосеред вшыткых краів на Словациі. Актуально заряджат 1237 мостами, з котрых 280 є частю доріг другой клясы і 957 третьой клясы. Середній вік мостів то 65 років. Вельо з тых мостів находит ся в нашых русиньскых селах, што сут на обшыри ПСК.
Ґорличане хочут передати інформацию будучым поколіням
Ґoрличане хотят лишыти інформацию для будучых поколінь. Така думка зродила ся вчас ремонту ґорлицкого ратуша. Ініцияторы хотят вмурувати в стіну ратуша тзв. капсулу часу. Початково урядникы зачали ся задумувати, што мож вложыти до такой капсулы. Рішено, што найліпше як будут там зложены інформациі од діти. Ученикы початковых кляс мали за задачу нарисувати Ґорлиці днес і за сто років, а тоты старшы – написати лист до будучых ґенераций. Кажда праца єст описана іменом, назвиском, іменами родичів ученика і назвом школы. До капсулы будут зложены окрем того ріжны памяткы, лист од бургомайстра і опис актуальной ситуациі в Ґорлицях, Польщы і на світі. Капсула буде вмурувана в стіну на поді ратуша.