Сумар дня на 23. лютого/фебруара 2024 р.

Приносиме вам сумар медияльной ґрупы ЛЕМ.фм+ на ден 23. лютого/фебруара 2024 р.

Творча Бібліотека в Рускій Бурсі

В Рускій Бурсі в Ґорлицях стартує Творча Бібліотека – цикль стріч для діти і молодежы, вчас котрых рыхтуваны будут розмаіты ручной роботы артефакты. Першы занятя пройдут уж в суботу 2. марця о 12.00 год., будут то варштаты малюваня акрильовыма фарбами полотняных мішків/торб. Малювати буде мож подля свойой думкы або од зрыхтуваных шаблонів. На другы занятя просиме о місяц, в суботу 6. квітня/апріля, будеме товды робити бібулковы квіткы, такы як давно (або недавно) робили нашы бабы. На Квітну Неділю (за старым календарьом) запрашаме на малюваня писанок традицийном батіковом методом, а о дальшых будеме інформувати в своім часі, будут то м.ін. варштаты ляльок-мотанок ци рыхтуваня традицийных вінців на гробы з сушеного квітя. Інструкторком занять є Олена Дуць. Вступне на вшыткы варштаты дармо – забезпечаме тіж материялы.

Прелекция про санітарну ситуацию і публичне здоровля в ґорлицкым повіті в ХІХ і ХХ ст.

А уж днес в Рускій Бурсі в Ґорлицях пройде першый з сериі штырьох тогорічных науковых выкладів. Прелекция буде на тему гіґієнічных і здравотных квестий на Лемковні. Выклад пн. «Санітарна ситуация і публичне здоровля в ґорлицкым повіті в ХІХ і в першій половині ХХ столітя» выголосит Даміан Новак з Музею Бічской Землі. Квестиі звязаны з санітарном ситуацийом ци шыроко понятыма квестиями охороны здоровля – особливо тыма, што тыкают публичного здоровля – становлят важну простір в істориі каждого реґіону ци місцевости. Хоц тема є обшырна то вказана буде в спосіб stricte локальный – на примірах выбраных місцевости, як на приклад Новиця ци Радоцина. Прелеґент буде бесідувал о проблемах в доступі до здравотной опікы – шпыталів, дохторів, акушерок, але тіж зреферує темы звязаны зо студнями, цмотнерями, обзерачами трупів, трупярнями ци омовит темы тыкаючы ветеринарийной опікы над худобом. Початок о 18.00 год. Трансмісию а пак запис выкладу можете обзерати через фанпейдж Стоваришыня Руска Бурса в Ґорлицях на сайті Facebook.

Выклад на тему штукы Новосільского на Тумскым Вечері

В найближшу неділю 25. лютого/фебруара во Вроцлаві одбуде ся першый в тым році Тумскій Вечір. В його рамках буде мож выслухати прелекциі Віталия Міхальчыка з Варшавского Університету пн. «Юрий Новосільскій. В гляданю іконы – одкрытя через штуку аванґарды». В другій части Вечера пройде концерт церковной музикы. Подія одбуде ся в костелі св. Креста во Вроцлаві. Початок о год. 19.30. Вступне на подію дармо.

75. років істнуваня польковицкой бібліотекы

Полковицка бібліотека святкує в тым році 75. ювілей істнуваня. Святкуваня зачала подія, підчас котрой угоноруваны были особы, котры особливо анґажуют ся в діяльніст бібліотекы і сперают єй розвиток. Званя «Амбасадора Бібліоотекы» отримал м.ін. бургомайстер Польковиц. Офіцийно польковицка бібліотека істнує од 1949 рока. Актуально бібліотечна збірка рахує около 90 тисячів еґземплярів. Окрем того інституция орґанізує чысленны варштаты, конкурсы і проєкты промуючы чытаня і розвиваючы заінтересуваня, єст місцьом меджепоколіньовых стріч. Подіі в рамках святкуваня 75. ювілею істнуваня бібліотекы будут проходити цілый рік. Заповіди дальшых подій будут публикуваны на інтернетовым сайті пляцівкы.