Сумар дня на 23. мая 2023 р.

Приносиме вам сумар медияльной ґрупы ЛЕМ.фм+ на ден 23. мая 2023 р.

Табір барскых конфедератів в Низкым Бескіді?

В Мушынці хотят одкрыти нову атракцию, табір барскых конфедератів і музей. Был бы то єдиный того типу обєкт в цілій Польщы. Як поінформувал бургомайстер Крениці Пьотр Рыба, власти ґміны будут ся старати побудувати музей, якій посвяченый буде барскій конфедерациі. Плян такой атракциі вказал ся уж рік тому, од того моменту місто зачало ся помалы старати о заміну обшыри з Державныма Лісами. Днес уж знатя, што бесіды закінчыли ся позитивні для міста і ґміна перейме місце, де находят ся окопы по історичній конфедерациі, пак зачнут ся працы при проєкті і стараня о фінансову підпору. Не єст то єдина атракция звязана з упамятніньом тых історичных подій в ґміні. Пару років тому одкрытый был шляк Барской Конфедерациі, котрый тішыт ся великом популярністю. Місто надіє, што нова атракция притягне до Мушынкы, як і до цілой ґміны, новых туристів – любителів істориі. Додатково явила ся тіж думка одкрыти наново до звиджаня Памятник Пулаского в Креници.

Нова форма звиджаня Свидника

Як поінформувала аґентура TASR, Туристичный Інформацийный Центр Свидник ввюл можливіст опроваджаня через цертифікуваных провідників. Місто од долшого уж часу хотіло збогатити свою туристичну оферту о можливіст опроваджаня професийональныма провідниками, але проблемом был брак цертифікуваных осіб з реґіону, котры ся тым занимают. А як передала представничка міста, туритсты в Свиднику і його околицях мают нагоду обзерати унікатову спадковину та історию. Інформациі про новы туристичны услугы мож найти м.ін. на інтернетовым сайті міста ци безпосередньо в туристичным центрі інфорамциі.

Kонцерт «Вечеря дла Мариі» в Высовій

Ґмінный Осередок Культуры в Устю Рускым просит до участи в «Вечері дла Мариі». Подія пройде 27. мая і зачне ся о 19.00 год. спільном прогульком участників на вершок горы Явір в Высовій, де о 20.00 год. зачне ся концерт. На пленеровій сцені запрезентуют ся Театральна Ґрупа «Племя», Ґалицийскій Хор і ансамбль Вспак. То уж друга едиция стрічы, але як підкрислили організаторы – того рока участникы будут мочы видіти і почути штоси цілком нове, але закля што не хотят за дуже здраджати. Припоминают тіж, што охочы, котры зо взгляду на своє здоровля не можут взяти участи в прогульці на вершок горы, можут ся сконтактувати з осередком культуры в справі орґанізациі транспорту.

Інвентаризация понад 400-літньой святыні з Підкарпатя

Краківскы студенты зінвентаризували неактивну, забыткову церков Св. Димитрия в Тыньовицях, в підкарпатскым воєвідстві. Інвентаризаця прошла в рамках табору Наукового Кружка Ґеодетів Рільничого Університету в Кракові при спілпрацы з Осередком Документациі Забытків в Ґорлицях і тыкала ся так зовнішной страны, як і середины церкви. Святыня з початку XVIII столітя то рідкій для того реґіону підкарпатского воєвідства примір церкви поділеной на три части з октаґональном навом.