Сумар дня на 23. серпня/авґуста 2021 р.

Приносиме вам сумар медияльной ґрупы ЛЕМ.фм+ на ден 23. серпня/авґуста 2021 р.

Неодолга кінчыт ся Нацийональне Повселюдне Списуваня

Іщы лем до кінця вересня/септембра 2021 рока потырват в Польщы Нацийональне Повселюдне Списуваня. Згідно з законом о публичній статистиці участ в списуваню єст обовязкова. Од початку квітня/апріля тр. проходит оно головні в інтернетовій формі, але мож ся тіж списати при помочы рахмайстрів. Вшыткы переданы в списі даны сут обняты статистичном таємницьом і сут анонімовы. Дакотры з чысел зобраных вчас тогорічного спису сут особливо важны дла лемківской меншыны. Мож в ним м.ін. окрислити свою нацийональніст і хоснуваный язык, в тым окрему лемківску нацийональніст і лемківскій язык. Припоминаме, же можете тото зробити максимально до кінця вересня/септембра 2021 рока.

Дотациі для ґмін реализуючых задачы звязаны з утриманьом лічничых функций курорту

Недавно інформували сме, же осмом курортам в малопольскым воєвідстві признано разом 8,409,000 зл з державного буджету. Каждый самоуряд, котрый реализує задачы звязаны з захованьом лічничых функций курорту, отримує дотацию з державного буджету в высокости рівной вплывам з курортной оплаты. Ґміны плянуют тепер, на што схоснуют отриману дотацию. Понад 332 тис. зл на реализацию задач звязаных з утриманьом лічничых функций курорту трафило до ґміны Устя Рускє. За Збіґнєвом Людвіном, війтом ґміны Устя Рускє, грошы будут схоснуваны м.ін. на утриманя пияльні, боіска Орлик і Центру Реґіонального і Туристичного Продукту в Высовій. Менше, бо нецілых 30 тисячів отримала ґміна Санкова. Як подала Малґожата Малух, війт ґміны Санкова, отримана квота поможе утримати зелін, посадити новы рослины і быти може дополнити малу інфраструктуру. Фурт актуальна єст тема біциґльовых стежок і іх розбудовы.

Маґурскій Ультрамаратон в Крампній

В днях од 13. до 14. серпня/авґуста Крампна была місцьом стрічы бігаючых з Польщы і заграниці. Брали они там участ в семій едициі Маґурского Ультрамаратону, трасы якого вели стежками Маґурского Нацийонального Парку. Участникы змагань стартували на штырьох дистансах (23, 49, 65 і 108 км). О популярности Маґурского Ультрамаратону може свідчыти медже інчыма тото, же і в тым році в змаганях взяли участ бігаючы не лем з цілой Польщы, але і з такых держав як Чешска Республика, Франция, Литва, Індия і Нова Зеляндия.

Новый резерват з ксильобіонтами і віковыма яворами

В Бєщадах одкрыли новый резерват природы. «Прислоп» был отвореный в тым місяци реґіональным директором охороны середовиска в Ряшові. Обнимат він більше як 200 гектарів старых дерев на обшыри Надлісництва Ліско. Можна там видіти м.ін. ксильобіонты, т.є. орґанізмы звязаны з мертвым деревом. Обєкт єст вынятковый, понеже великом його частю єст добрі захованый тзв. вільгітный вариянт карпатской бучыны з примірами віковых яворів.

Як ся вести, кєд стрітиме медведя

На своім фейсбуковым профіли Татряньскій Нацийональный Парк припоминат, як ся вести, кєд стрітиме медведя. Звірята тоты мож актуально стрітити головно в місцях, де росне дуже яфыр. Природникы припоминают, же кєд стрітиме медведя, не мож ся піддати паніці. Як то можливе, треба спокійно одыйти. А і звіря повинно скоро ся успокоіти, кєд чловек вкаже охоту одыйти.