Сумар дня на 23. січня/януара 2020 р.

Приносиме вам сумар медияльной ґрупы ЛЕМ.фм+ на ден 23. січня/януара 2020 р.

Міністер інформувал меншыны

Соймова Комісия Нацийональных і Етнічных Меншын выслухала в віторок, 21. січня/януара, інформациі шефа Міністерства Внутрішніх Справ і Адміністрациі про пріоритеты політикы взглядом нацийональных і етнічных меншын на рокы 2020-2024, котры представил віцеміністер ресорту Блажей Побожый. Як передал Комісиі віцеміністер Побожый, його ресорт на рокы 2020-2024 заплянувал діяня, котры складают ся на пят пріоритетів. Першом справом має быти забезпечыня справной, ретельной і терміновой обслугы внесків о дотациі на реалізацию задач, котрых цілю є охорона, захованя і розвиток культуровой достоменности нацийональных і етнічных меншын та захованя і розвиток реґіонального языка. Другом задачом є електорнічный набір внесків о признаня дотаций. Третя задача то зрыхтуваня і опрацуваня заложынь дальшой едициі проґраму для ромской соспільности. Побожый поінформувал, што 2020 рік є посліднім, в котрым реалізуваный є «Проґрам інтеґрациі ромской соспільности в Польщы на рокы 2014-2020». Забезпечыня справной обслугы засідань Спільной Комісиі Уряду та Нацийональных і Етнічных Меншын то четвертый выміненый віцеміністром пріоритет. Пятым елементом є медженародова спілпраца.

Свидник припомнул 75. річницю освободжыня

Місто Свидник в неділю 19. січня/ януара припомнуло 75 років од свого освободжыня. Пєтныма актами, выставом і святочном академійом в тот ден Свидник закінчыл серию подій, присвячену тій річници. В святочным недільным проґрамі брали участ представникы державы, міста і окресу Свидник, представникы політичных партий і ріжных орґанізаций та інституций. В попередніх днях місто зреалізувало веце супроводных подій, як напримір квіз знань о войні і проєкциі для школярів основных шкіл в Свиднику, ци дискусный форум вєдно з одкрытьом выставкы. Як звернула увагу пріматорка міста Марцеля Іванчова, перемога над фашызмом была вызначным пунктом, бо жытя в мирі не є природным само в собі. Додала, же нашым обовязком єст, жебы ся война николи не повторила. Місто приготовило і серию статій о персонах періоду войны, менами котрых сут названы улиці Свидника.

Тырват «Тыжден молитв за єдніст християн»

В цілій Польщы тырват «Тыжден молитв за єдніст християн». Єдна з молитовных стріч проходила в мунилу неділю в ліґницкій римокатолицкій катедрі. Молитву, як ґазда, очелювал тамтышній ліґницкій єпископ Збіґнєв Кєрніковскій. Участ взяли медже інчыма парох православной парохіі Воскресіня Христового в Ліґници, о. Любомир Воргач, та парох місцевой грекокатолицкой парохіі Успіня Пресвятой Богородиці, о. Мирослав Драпала. Подібна екуменічна стріча пройде уж днес в православній церкви св. Михала Архангела в Зимній Воді при Любіні. Тамтышня парохія буде гостила священників і вірных інчых християньскых спільнот. Подібні як в обох ліґницкых парохіях, в парохіі Зимна Вода вірныма сут головно Лемкы, потомны выселеных з Лемковины Бортнян. Настоятельом є о. митр. Славомир Кондратюк. Тыжден зачал ся 18. січня/януара і буде тырвал до 25. січня/януара.

«Лемкы. Медже інтеґрацийом а розбитьом (1918-1989)»

Містецка Бібліотека в Мушыні в середу, 29. січня/януара, орґанізує авторску стрічу з др Анном Вільк. То авторка остатньой лемкознавчой книжкы під назвом «Лемкы. Медже інтеґрацийом а розбитьом (1918-1989)». Стріча зачне ся о 17.00 год. в бібліотеці при ул. Рынок 31. Книжка др Вільк присвячена єст політичным діям Лемків. Має представляти історию лемківской ґрупы на фоні процесу выокремляня ся ґруповой єдноты, тіж з пункту пізріня на достоменніст в ситуациі украіньско-польской ривалізациі о включыня Русинів до свойой нацийональной спільноты, а, як знаме, Лемкы николи не піддавали ся добровільно тискам чужых наций. В книжці пише ся і о проблемі дезінтеґрациі ґрупы по проведеных выселінях. Книжка остатнім часом трафила на листу пятьох найцікавійшых січньовых новости в Книгарни Одкрывці.