Сумар дня на 23. вересня/септембра 2021 р.

Приносиме вам сумар медияльной ґрупы ЛЕМ.фм+ на ден 23. вересня/септембра 2021 р.

Стріча з Копровскым, яку поведе наш редакцийный колеґа

Днес о 20.00 год. одбуде ся онляйнова стріча з автором книжкы «Лемкы – доля загыблого народу». Модератором буде наш редакцийный колеґа – Даміян Трохановскій. Орґанізатором подіі єст Стоваришыня «Ґлоґівска Кресова Едукация», Містецка Публична Бібліотека в Ґлоґові та бібліотекы в Болеславци і Польковицях. Авторска стріча з Мареком Копровскым буде получена з презентацийом книжкы. Мотузок до стрічы онляйн найдете на фейсбуковым сайті Стоваришыня «Ґлоґівска Кресова Едукация».

Владыка Йоан Бабяк з коронавірусом

Пряшівскій грекокатолицкій арxієпискoп і митрополита Йоан Бабяк отримал в послідню суботу позитивный результат тесту на COVID-19. Владыка є в домашній кварантанні, принял вакцину і має лем середні симптомы захворіня. О захворіню владыкы Бабяка Конференция Єпископів Словациі поінформувала і Ватикан. Бабяк в часі недавной візиты папы Франциска на Словациі (12.-15. вересня/септембра) брал участ в многых подіях, участником котрых был і голова католицкой церкви.

На ратунок Лабовій

Припоминаме, што Лемківскій Ансамбль Пісні і Танця «Кычера» просит до участи в камінярскых варштатах в Лабовій. Акция пройде в рамках третього етапу модернізацийных прац на цмонтери в Лабовій, єдным з найстаршых цмонтерів на Лемковині. Охочы будут мати нагоду навчыти ся працы при пісковци під оком каменяря Шымона Моджеєвского зо Стоваришыня Маґурич. Як підкрисляют орґанізаторы, волонтеры мают запевненый нічліг і ідло, а участ в варштатах то нагода, жебы навязати і новы знаємости. Камінярскы варштаты будут проходити од 27. вересня/септембра до 2. жолтня/октобра.

Зголошуйме кандидатів до нагороды ім. Райнфуса

До 29. жолтня/октобра 2021 р. мож зголошувати кандидатів до 10. едициі Нагороды Малопольского Воєвідства ім. Романа Райнфуса. Оцініня є признаване за выдатны осягніня в обшыри плеканя локальной культуровой достоменности в Малопольщы. На лавреатів жде пуля 20 тис. зл, яка є уфундувана з воєвідского буджету. Кандидатів можут зголошувати і лемківскы орґанізациі. Дотля нагороду ім. Райнфуса отримали м.ін. Павел Стефановскій ци Петро Мурянка. Детальны інформациі найдете примірно на сайті ґорлицкого повіту.