Сумар дня на 23. вересня/септембра 2022 р.

Приносиме вам сумар медияльной ґрупы ЛЕМ.фм+ на ден 23. вересня/септембра 2022 р.

В Мукачеві одкрытый будинок творчости Адальберта Ерделі

Як поінформувала на своім інтернетовым сайті Закарпатска Областна Рада, 19. вересня/септембра в Мукачеві прошло одкрытя будинку творчости єдного з основателів Підкарпатской Школы Малюваня Адальберта Ерделі. В будинку тым артиста жыл од 6 рока жытя, як дорослый часто одвиджал в ним своіх родичів. Його ремонт зачал ся в 2019 р. Автентичный выгляд обєкту, такій, якым го описал сам Ерделі, не был одтвореный, был бо пару разів перебудовуваный. Находит ся в ним тепер постійна експозиция репродукций найвызначнійшых образів Ерделі, ориґіналы рукописів, телеґрамы, листы і інчы особисты річы артисты. Адальберт Ерделі вродил ся в 1891 р. як Іван Гриць в селі Загатя на Підкарпатю, котре товды нележало до Мадяр. Студиювал на Будапештскій Академіі Красных Штук. В першій половині ХХ ст. основал разом з другым вызначным русиньскым малярьом Йосифом Бокшайом в Ужгороді славну Підкарпатску Школу Малюваня, яку ся дало порівнувати з дакотрыма товдышніма европейскыма малярскыма школами. Основом для створіня школы было Общество дѣятелей изобразительныхъ искусствъ на Подкарпатьской Руси, в основаню якого так само брал участ Ерделі. Творы Адальберта Ерделі были іщы за його жытя выставлюваны в вельох европейскых культурных метрополиях.

Печатаный «Правопис шлезского языка»

На выдавничым рынку явила ся долгождана хоснувателями і дослідниками шлезского языка публикация. Автором книжкы пн. «Правопис шлезского языка» єст проф. Генрик Ярошевич. Публикация з основныма інформациями о шлезскым языку, правилами орфоґрафіі, орфоґрафічным словником і ґраматичным додатком буде печатана выдавництвом IKRiBL/Інститут Реґіональной Культуры і Літературных Досліджынь правдоподібно іщы в тым місяци, або на початку будучого. За проф. Йолянтом Тамбор зо Шлезского Університету – тота праца єст барз потрібна, кєд же на такы усталіня і омовліня ждут і чытачы шлезскых текстів, і писателі, журналисты, есеісы, і социйолінґвісты обсервуючы черговый нормотворчый етап. Як оцінил проф. Томаш Камуселля з University of St Andrews, праца проф. Ярошевича выполнит хоснувателям і дослідникам штораз векшый брак основой ґраматикы того языка.

Тяжкы условія в горах

Бєщадскій Нацийональный Парк выдал комунікат, в котрым інформує о тяжкых условіях на шляку. Як пишут, в горах панує осіння атмосфера, при сильным вітрі температуры падают до близко 0 градусів. Выже 1000 м н.р.м. появляют ся періодичны опады мокрого снігу. В такых условіях легко ся выхолодити, конечне єст одповіднє облечыня, термос з горячым напитком і мериндя. Шлякы сут слизкы, зато вартат мати зо собом трекінґовы кыйкы або інче додаткове підпертя.

22. Свято Меду і Вина

Уж заран в Пшемкові зачне ся 22. Свято Меду і Вина. То як дотепер єдина того рода подія в Европі. Пшемківскє свято, окрем медів і вина, то тіж богатый в атракциі проґрам. На естраді в містным парку запрезентує ся м.ін. ансамбль Ластівочка. Традицийом тіж є, што в другій ден проходит екуменічне богослужыня при участи парохів вшыткых місцевых конфесий, в єдным з пшемківскых храмів. Того рока літругію будут правити в православній церкви покровы св. Михала Архангела. Нижньошлезскє Свято Меду і Вина в Пшемкові было в 2008 р. обняте охороном Патентового Уряду Польской Республикы.