Сумар дня на 24. червця/юнія 2021 р.

Приносиме вам сумар медияльной ґрупы ЛЕМ.фм+ на ден 24. червця/юнія 2021 р.

Просиме до Чмеля на «Лемківскє Літо»

По долгій пандемічній перерві вертают лемківскы імпрезы, якы вписали ся уж в постійный календар нашых подій на чужыні. Таком як раз імпрезом єст «Лемківскє Літо», якє одбуде ся уж в тоту суботу, 26. червця/юнія в Чмели, на Нижнім Шлеску. Подія зачне ся о 15.00 год. В проґрамі сут лемківскы народны і забавовы ґрупы. Орґанізаторы заєдно інформут, што глядают волонтерів, якы могли бы помочы при рыхтуваню «Лемківского Літа». Охочых просит ся о контакт за майльовым адресом: cerkiew_lubin@op.pl. «Лемківскє Літо» то подія, яка єст рыхтувана, жебы підтримувати і популяризувати лемківску культуру головного в любіньскым повіті, але принимана єст она радо і через польскых сусідів. На подію красні просит орґанізатор – православна парохія св. Тройці в Любіні з єй парохом о. Богданом Репелом.

Руска Матка проти фінансуваню з Украіны

19. червця/юнія засідала президия орґанізациі Руска Матка, котра діє в Сербіі і є членом Світового Конґресу Русинів. Семох присутных членів президиі вырішыло, жебы Руска Матка урядово зареаґувала на Нацийональный Совіт Русинів, русиньскій самосправный орґан, з причыны несхваленых фінансовых середків на проєкты, котры орґанізация подала, в першым ряді на друкуваня свого офіцияльного пресового орґану «Руснак». Руска Матка буде реаґувала і на активности Проєктового Бюра Нацийонального Совіту, де є запропонуване гляданя фінансуваня з Украіны як громадянам той державы в діаспорі, з чым Руска Матка не є згідна. Вчас засіданя порушены были і інчы внутрішні проблемы, з котрыма стрічат ся русиньска меншына в Сербіі.

Ближыт ся православне поломничество на Святу Гору Явір

Перед праздником свв. Апостолів Петра і Павла одбуде ся ХХХІ православне поломництво на Святу Гору Явір. Поломникы выйдут в суботу, 10. липця/юлия, з Ґорлиц, де в катедральным храмі буде служена літургія. Пак будут путувати до Ґладышова через Маластівску Маґуру. Наступного дня, по ранішніх молитвах выйдут з Ґладышова в сторону Ганчовы, через Реґєтів. В ганчівскій церкви о 18.00 год. одбуде ся Всеночна. В празднидк свв. Апостолів поломникы выйдут з Ганчовы і подадут ся ґу Высові, де при місцевій церкви будут витати прибывшых архієреів. О 10.00 год. на Святій Горі Явір зачне ся Божеска Літургія. Охочых взяти участ в поломництві просит ся контактувати з о. Юлияном Феленчаком або членами єпархіяльного братства. Записы тырвают до 7. липця/юлия.

Поломничество Русинів до Риму

Як інформує Грекокатолицка Церков на Словациі, неодолга єй вірны (в тым Русины) одбудут поломництво до Риму. Грекокатоликы принесут зо собом ікону Пресвятой Богородиці з Клокочова, якій єст важным поломницкым центром про Русинів Словациі. Нагодом поломництва є історичный ювілей – 350 років од слезиня іконы. Офіцияльна пут грекокатоликів зачне 28. червця/юнія літургійом в Базилиці св. Павла о 18.00 год. На праздник свв. Апостолів Петра і Павла путникы возмут участ в літургіі, котру поведе папа Франциск в Базилиці св. Петра, де буде выставлена ікона Клокочівской Богородиці.