Сумар дня на 24. липця/юлия 2026 р.

Приносиме вам сумар медияльной ґрупы ЛЕМ.фм+ на ден 24. липця/юлия 2026 р.

Майльова скринка до моніторуваня дискримінациі членів нацийональных і етнічных меншын в Малопольщы

Жытелі Малопольского Воєвідства фурт можут корыстати зо специйальной майльовой скринкы, зебы зголошувати інциденты языка ненависти, дискримінациі, погорозы ци інчых проявів словной або символичной аґресиі, з котрыма стрічают ся члены нацийональных і етнічных меншын. Майльовый адрес mnie@malopolska.uw.gov.pl был одкрытый влони, в навязаню до стрічы з орґанізациями нацийональных і етнічных меншын в Малопольщы, што одбыла ся в Малопольскым Воєвідскым Уряді в Кракові. Цілю одкрытя скринкы єст зберяня інформаций необхідных для моніторуваня языка ненависти на рівни воєвідства, уможливіня скоршого реаґуваня на непокоючы соспільны сиґналы, будуваня діалоґу і зміцняня довіря медже публичном адміністрацийом і меншыновыма соспільностями.

Рекордове чысло кандидатів на кашебску етнофілолоґію

Завершыла ся рекрутация на напрям кашебска етнофілолоґія на Ґданьскым Універсистеті. Як подала др Юстина Помєрска, ведуча Проґрамовой Рады того же напряму, в тым році, першыраз в тринадцетлітній істориі рекрутациі, в липци/юлию аж 25 кандидатів зложыло документы. Філолоґічный Выділ Ґданьского Університету принял на напрям аж 27 осіб в рамках основной рекрутациі. Тото рекордове чысло то велика радіст і шанса для продолжаня і розвитку кашебской культуры, языка і літературы. Кашебска етнофілолоґія то унікатны, 3-літні студиі першой ступени, котры лучат вчыня реґіонального языка з етнофілолоґійом, історийом і літературом. Абсольвенты отримуют управліня до навчаня кашебского і польского языка та до працы в поморскых інституциях культуры.

Дармовы варштаты писаня ікон для жытелів Репеди

В Репеди одбудут ся дармовы варштаты писаня ікон для жытелів. Варштаты пройдут в рамках реализациі проєкту «Реґіональны Ґранты на Ревітализацию – Едиция 2025» з нагоды 500. річниці основаня села Репедь і 200 річниці посвячыня церкви в Репеди. Буде то нагода не лем до познаня традицийной методы жолтковой темперы і выконаня власной іконы, але тіж до спільной стрічы, бесіды та будуваня односин вколо істориі і дідовизны Репеди. Занятя поведе Ольґа Рудліцка з Репеди, артистка з ґрупы «Бескідникы», што занимат ся традицийном техніком писаня ікон. Занятя будут ся одбывати циклично в вызначеных термінах в Репеди. Орґанізатор запевнят прирыхтуваны дощкы, материялы потрібны до выконаня ікон і почастунок. Номер телефону до записів найдете гев.

36. Лемківска Ватра в Лугах і «Од Русаль до Яна» в Музею Лемківской Культуры в Зындрановій 

В тот вікенд одбудут ся дві шторічны лемківскы подіі. Уж днес в Лугах в любушскым воєвідстві загорит 36. Лемківска Ватра, яку орґанізує Стоваришыня Лемко Товер зо Стшелец Краєньскых. В проґрамі тогорічной Ватры запрезентуют ся м.ін. Лемко Товер Юньор, Ластівочка, Ластівчата, Кычера, Юлия Дошна, Троянда, Бурян, Серенча, Дуляровы Братя ци Надія. Подія потырват аж до неділі над раном. А уж заран в Музею Лемківской Культуры в Зындрановій зачне ся свято «Од Русаль до Яна». В рамках дводньового проґраму предвиджене єст звиджаня музею, промоция книжок і стрічы з авторами, выклады, показы ремесла, ци конкурсы. На концертах запрезентуют ся Свидницкы Геліґонкарі, Капеля Дукляне, Ославяны, Калина, Маковиця, Мариянна Железна і Гоґаш, Карпатія, Гудаци, Гудобна Ґрупа Еста та Бурян. В оба дни святкуваня завершыт ся огниском.