Сумар дня на 24. листопада/новембра 2023 р.

Приносиме вам сумар медияльной ґрупы ЛЕМ.фм+ на ден 24. листопада/новембра 2023 р.

Новый склад соймовой Комісиі Нацйийональных і Етнічных Меншын

В минулым тыжни польскій Сойм принял резолюцию в справі выбору особовых складів постійных соймовых комісий. В звязку з тым прошли засиданя реченых комісий, на котрых были выбераны іх новы президиі, в тым Комісиі Нацйийональных і Етнічных Меншын. Шефовом Комісиі Нацйийональных і Етнічных Меншын черговый раз остала Ванда Новіцка (Лівиця), а єй заступцями – Моніка Роса (ГК) і Войцєх Зубовскій (ПіС). Третій віцеведучый буде выбраный в дальшым терміні.

Словацкє турне ансамблю Рутенія

Фольклорный ансамбль Рутенія з Братиславы зачынат в тот вікенд словацкє турне. В його рамках запрезентуют в штырьох містах на сході Словациі свій танцювально-драматичный проґрам «Хырбетом ґу горам», котрым одзначыли 10-літя того русиньского ансамблю. В рамках проґраму ґрупа запрезентує співы, музику і танці з русиньскых сел окресу Стара Любовня і Підкарпатской Руси, але і припомне важны історичны моменты з діів Русинів і долю вызначного роду Бескідів. Окрем Фольклорного ансамблю Рутенія в представліню грат русиньскій актор Володимір Чема, котрый має ролю Николая Бескіда. На сцені буде мож видіти і Народну музику Рутенія і Дітячій фольклорный колектив Рутенячык. Проґрам буде мож обзерати уж в тот вікенд в Снині (заран) і в Пряшові (в неділю), а дальше в вікенд 09.-10. грудня/децембра в Свиднику і Старій Любовни. Проєкт єст реализуваный з фінансовом підпором Фонду на підпору культуры нацийональных меншын Словацкой Республикы. Мотузок до продажы білетів, як і веце інформаций о проґрамі і його творцях найдете на фейсбуковым сайті Рутеніі.

Польковицка коменда орґанізує дебату про безпеку сеньорів

Польковицкы поліциянты побесідуют з сеньорами о іх безпеці. «Побесідуйме о безпеці сеньорів – Можеш мати на тото влиян» – то госло, під якым в середу 29. листопада/новембра пройде евалюацийна дебата, орґанізувана поліциянтами з польковицкой коменды. Функцийонеры порушат на ній темы звязаны з безпеком сеньорів, в тым м.ін. припомнут методы діянь злодіів діючых методами «на внучка» і «на поліциянта» на основі остатніх припадків зареґіструваных на обшыри польковицкого повіту. В звязку з чысленныма зголошынями перекрачаня дозволеной скорости на дорогах, поліциянты будут тіж припоминати о конечности хоснуваня одблесковых елементів, котры значучо підносят рівен безпекы хоснувателів. Запознают участників з Державном Мапом Загорожынь Безпекы і вкажут, як найти найблизшу єдиницю полициі і навязати з ньом контакт. В стрічы возмут участ представникы Центра Культуры і жытелі польковицкого повіту.

Уж заран видиме ся в Рускій Бурсі 

Припоминаме, што уж заран, в суботу 25. листопада/новембра, просиме вас на неформальну стрічу в Рускій Бурсі в Ґорлицях, на якій м.ін. спрібуєме одповісти на звіданя ци Лемкы ворожыли си на велию св. Андрия. Стріча буде нагодом до забавы перед филипівком, а тоты, котрых обовязує уж різдвяный піст, стрічу можут портактувати як вечіркы, што традицийно проходили в осінньо-зимовым часі. «Вечіркы полнили важну товариску функцию і мимо тырваючого посту – розрывкову» – подают писаны джерела. Видиме ся в Рускій Бурсі в Ґорлицях уж заран од 17.00 год. Буде тепла страва і музика.