Голосник

Сумар дня на 24. лютого/фебруара 2020 р.

Приносиме вам сумар медияльной ґрупы ЛЕМ.фм+ на ден 24. лютого/фебруара 2020 р.


Проєкт уставы, што вызнає шлезскій язык як реґіональный

В пятницю, 21. лютого/фебруара, в Медженародный Ден Материньского Языка, зложеный был в польскым Соймі проєкт уставы, што вызнає шлезскій язык як реґіональный. Проєкт єст результатом спілпрацы ріжных парляментарных клюбів – Гражданьской Коаліциі, Лівиці та Польского Народного Сторонництва. Піднята была дискусия під гослом «О шлезскым і вілямівскым языках в Соймі». Подля авторкы проєкту, посланкыні Монікы Росы, Польща може быти державом приязном меншынам, кєд іх тема буде фурт присутна в публичній дебаті. Права меншын, в тым право до захованя свойой культуры і языка, повинны быти основныма громадяньскыма правами. Зато выникнула потреба покликати Парляментарный Ансамбль дс. Шлезского Языка і Шлезской Культуры. Цілю ґрупы єст анімувати публичну дебату вколо темы шлезского языка та зрыхтувати основу під вызнаня го реґіональным языком і введіня до шкіл. В обшыри заінтересувань ґрупы сут тіж інчы меншыновы языкы. В соймовій дебаті взяли участ м.ін. проф. Ева Міхна, проф. Юстина Олько та Марцін Мусял. По дебаті прошла пресова конференция про зложыня проєкту уставы о узнаню шлезского реґіональным языком.

26. едиция Конференциі «Европа Карпат»

В вікенд 22. і 23. лютого/фебруара прошла в Красічыні 26. едиция Конференциі «Европа Карпат». Парляментаристы, експерты, самоурядовці, міністры і науковці стрітили ся на Підкарпатю, жебы побесідувати о стратеґіі розвитку Карпат і розвитку інфраструктуры реґіону, а тіж о парляментарній спілпрацы на обшыри Середньо-Східньой Европы. Конференциі товаришыло вельо додатковых подій, як м.ін. І Медженародный Форум Спілпрацы Молодых Обшыри Карпат і Ініциятивы «Триморя», што орґанізуваны были в Нацийональным Музею Перемышльской Землі. Перша конференция «Европа Карпат» одбыла ся в 2010 році. Сесиі реґулярно проходят м.ін. в Креници, Перемышли і Красічыні. Стрічы мают на ціли укріпляти спілпрацу і розвивати партнерскы звязкы медже державами реґіону. Єдночасно, конференция являт ся форум выміны поглядів і думок, тыкаючых спільных діянь для розвитку не лем Карпат, але і обшыри Триморя і Середньо-Східньой Европы.

Конкурс презентациі духовных творів в Меджелабірцях

Православна церковна спільнота в Меджелабірцях, Громадяньскє Стоваришыня Ніка Меджелабірці та Братство Православной Молодежы на Словациі, одділіня Меджелабірці, просят на 15. едицию конкурсу презентациі духовной поезиі, прозы та співу. Конкурс пройде 2. мая того рока в Домі Дітины св. Миколая в Меджелабірцях. Подія зачне ся молебньом і реґістрацийом участників, пак пройдут конкурсовы презентациі і оголошыня результатів конкурсу. Змагати мож аж в семох катеґориях, пят з них то віковы ґрупы. Окремы катеґориі то власна творчіст та спів духовных і народных творів. Зголошыня треба слати до 30. квітня/апріля на майльовый адрес одділіня Братства Православной Молодежы в Меджелабірцях.

Концерт лемківской музикы для родин в Быдґощы

Фундация Креативной Едукациі просит на концерт лемківской музикы для родин з малыма дітми. Пройде він в суботу, 29. лютого/фебруара, в Куявско-Поморскым Центрі Культуры, што ся находит при пл. Костелецкым в Быдґощы, о год. 10.00. Выступлят Сестры Бочнєвич з Пшемкова, Йолянта Ґабрылкєвич та Марта Трудзіньска. Окрем лемківского репертуару запрезентуваны будут тіж пісні і ритмічанкы інспіруваны народном польском музиком та музиком інчых нацийональных меншын жыючых в Польщы. Суґерувана мінімальна вплата на статутовы цілі то 10 зл за дітину і 20 зл за родича. Треба обовязково резервувати місця.

Шеруй.

О авторі

Ленка Стефановска

Коментарі