Сумар дня на 24. лютого/фебруара 2022 р.

Приносиме вам сумар медияльной ґрупы ЛЕМ.фм+ на ден 24. лютого/фебруара 2022 р.

Выклад проф. Фейсы в Пряшові

Вчера, 23. лютого/фебруара, в Бібліотеці Карпаторусиністикы, котра належыт під Інститут Русиньского Языка і Культуры Пряшівского Університету, студенты, але і вшыткы заінтересуваны мали можливіст выслухати выклад проф. Михайла Фейсы з Сербіі. Проф. Фейса выкладат морфолоґію і лексиколоґію русиньского языка на Одділіню Русиністикы Філософічного Факультету Університету в Новым Саді. До Пряшова пришол з доповідю під назвом «Русиньска меншына в Войводині (язык, культура, реалиі)». Фейса зробил шыроку історичну екскурсию до реалий нашой найстаршой русиньской діаспоры, котра з Карпат одышла на територию днешньой Сербіі в ХVIII ст. В своій доповіди підчеркнул, што Русины в бывшій Югославіі як єдины офіцияльно істнували і мали вшыткы своі права і інституцийональне забезпечыня. Проф. Фейса перед лекцийом передал Валерийови Падякови з пряшівского русиньского інституту і найновійшы выданя од войводиньскых Русинів. Передал коло 100 книжок до Інституту.

Невыбух в Санковій

Вчера до Санковы были закликаны саперы і поліция. Было тото повязане з підозріньом выявліня ся невыбуху з часів войны. Зброя была найдена в околици спортового пляцу (боіска Орлик) в самым центрі Санковы. Невыбух был фактично найденый і забезпеченый. Як інформувала поліция, походил він з часів І світовой войны. Была то німецка артилерийска куля калібер 77 міліметрів. Ціла обшыр была провірена, а найдена зброя забрана саперами до Ряшова. На час інтервенциі обшыр пляцу і близкых хыж была закрыта. В Карпатах, а самособом в околицях Ґорлиц часто находят мілітариі з часів І і ІІ світовой войны. Треба все мати позір.

25 років од основаня Кошыцкого Апостольского Еґзархату

В остатній понедільок в Кошыцях припомнули 25. річницю основаня Кошыцкого Апостольского Еґзархату. Еґзархат был зарядженый на териториі Кошыцкого Самосправного Краю булльом Ecclesiales communitates папы римского Йоана Павла ІІ. Територия была одділена од товдышньой Пряшівской Грекокатолицкой Єпархіі. За першого еґзарху был призначеный владыка Мілян Хаутур. Еґзархат был в 2008 р. реорґанізуваный на єпархію і достал ся до складу Пряшівской Митрополиі. Еґзархат, а пак і єпархію вюл аж до 2020 р. владыка Хаутур, од 2020 як апостольскій адміністратор, і од 2021 як єпарха веде єпископство архієпископ Кірил Василь. Кошыцка єпархія своім обсягом обнимат і русиньску територию.

Засіданя власти РОС

Вчера одбыло ся засіданя Выконного Выбору Русиньской Оброды на Словациі. Засіданя скликал председа орґанізациі Мартін Караш. Зачало ся оно о 14.00 год. в Меджелабірцях. Члены той найбільшой русиньской орґанізациі на Словациі розправляли про проґрам діяльности на тот рік. Бесідували м.ін. о цілословацкым конкурсі Духновичів Пряшів, акциі Співы Мого Роду і о інчых подіях, котры з огляду на пандемію не могли ся дотепер орґанізувати. В тот ден засідал і контрольный орґан – Дозорна Рада Русиньской Оброды на Словациі.