Сумар дня на 24. марця 2022 р.

Приносиме вам сумар медияльной ґрупы ЛЕМ.фм+ на ден 24. марця 2022 р.

Одпразднували сме Світовый Ден Русинів

Вчера святкували сме Світовый Ден Русинів. Ден тот признаный єст на 23. марця. Дата, котра была схвалена Світовым Конґресом Русинів в 2017 р. в хорватскым Осієку, припоминат І Світовый Конґрес Русинів, котрый одбыл ся в 1991 р. в Меджелабірцях. Як раз там вчера проходили і торжественны святкуваня, котры орґанізувала Русиньска Оброда на Словациі (членьска орґанізация СКР) во спілпрацы з містом Меджелабірці. Проґрам зачал ся пополудни святочным походом, котрый пішол до Дому Культуры, в котрым першый конґрес проходил, там продолжувал ся дальшый святочный і культурный проґрам. Партнерами події были Основна Школа на Духновичовій улици і орґанізация Лабірскы Русины. Пруситны положыли квітя під пропамятном таблицьом, яка одкрыта была в 2016 р. на будинку лабірского Дому Культуры.

Стоваришыня Лемків помагат Украіні

Стоваришыня Лемків спільні з інчыма середовисками Карпатскых Русинів влучыло ся в гуманітарне діло спомагяня жертв войны на Украіні. За зобраны од жертводавців грошы куплены будут спожывны продукты і середкы гіґієны і переданы на граничным пункті в Убли русиньскым волонтерам з Мукачева. Головный Заряд Стоваришыня Лемків просит о фінансовы вплаты на поданый на вебсайті орґанізациі банковый рахунок, або через систем інтернетового склепу Стоваришыня Лемків. На Украіні прожыват не лем великє чысло корінных жытелів Підкарпатской Руси – Русинів, але і выселенці, а предовшыткым потомны тых, што были выселены на Украіну в 40. роках ХХ ст. з рідной Лемковины.

Помагат і Стоваришыня «Руска Бурса»

Припоминаме, што подібны інциятивы ведут тіж бурсакы і Стоваришыня «Руска Бурса» в Ґорлицях. Од початку войны анґажуєме ся в діяня гуманітарной помочы для Украіны, але потребы з годины на годину роснут, зато хочеме іщы барже пошырити нашы діяня. Звертаме ся до Вас з прошыньом підперти нашу активніст. Поміч од нас трафила уж м.ін. до самого Кыйова ци на Підкарпатску Русь. Грошы можете вплачати на PayPal Руской Бурсы. A конкретны річы (як продукты до іджыня з долгым терміном придатности, косметикы ци домашні хімічны середкы) просиме приносити до Бурсы (штоденно в год. 10-14) або до склепу RSCars в Бічы. Дякуєме!

Деревяна хыжа в Тополі

В селі Тополя, сниньского окресу (Словация), де народил ся будитель Александер Духнович, выникат копія традицийной деревяной хыжы зо зламу XІХ і ХХ ст. Вшытко то ініциятива здружыня Кошар, котре ся заняло реалізацийом того заміру вдяка реґіональній дотациі з проґраму підпоры найменьше розвиненых окресів Міністерства Інвестиций, реґіонального розвитку і інформатизациі Словацкой Республикы. Деревяна хыжа буде служыла як ремесельный центр. Люде будут годны познати ремесла. Хыжу зачали будувати влони і дістали на ню дотацию 61 тис. евро. Робота теслярів робила ся в традицийный спосіб, без цвяків. В найблизшым часі має зробити ся шындльова стріха і дальшы елементы.