Сумар дня на 24. серпня/авґуста 2022 р.

Приносиме вам сумар медияльной ґрупы ЛЕМ.фм+ на ден 24. серпня/авґуста 2022 р.

Споминали Михала Чабалу

В четвер, 18. серпня/авґуста, в Словацкым Нацийональным Музею – Музею Русиньской Культуры в Пряшові проходила споминова подія про выдатного маляря Михала Чабалу звязана з 20. річницьом його смерти. На стрічы мож было видіти пару образів авторства Чабалы, выслухати документально-артистичный проґрам м.ін. з фраґментами реляций о жытю артисты авторства Михала Бицько і фраґментами його інтервю з артистом на рік перед смертю. Были емітуваны і фраґменты проґрамів о Чабалі реализуваны словацком публичном телевізийом. Проґрам дополняли выступы Матуша і Луциі Новотных, оперовых співаків. Важном частю стрічы были особисты спомины о артисті Яны Трущыньской-Сивой, Федора Віца, Ярослава Шуркалы, Міляна Хомы і інчых, котры пришли поділити ся тым, што з Михалом Чабалом пережыли, якым был чловеком, котрого называют остатнім пряшівскым богемом. Михал Чабала был професийным малярьом, по короткій карєрі академіцкого педаґоґа выбрал жытя свобідного артисты.

Премєр Словациі присутный на грекокатолицкым святі

20. і 21. серпня/авґуста в Лютині – найвекшым поломницкым місци грекокатоликів на Словациі, прошол архієпархіяльный кєрмеш з нагоды праздника Успіня Пресвятой Богородиці. Духовный проґрам прошол традицийні в двох місцях – в базилиці мінор прямо в селі, як і на Марияньскій Горі над Лютином, де перед більше як 170 роками зявил ся св. Миколай вдові Зузані Фекете. Торожественну архієрейску літургію служыли архієпископ Кірил Василь, кошыцкій єпархіяльный єпископ, апостольскій адміністратор пряшівской архієпархіі і братиславскій єпарха владыка Петро Руснак, двох емеритных владыків та парудесятох священників. В празднику участ брал і премєр Словацкой Республикы Едуард Геґер, депутаты Нацийональной Рады Словацкой Республикы і председа Пряшівского Самосправного Краю Мілян Маєрскій з женом Міріям Лексман, котра є депутатком Европейского Парляменту. Богослужыня з суботы і неділі трансмітували в цілословацкых медиях.

Дальша поміч біженцям з Украіны

Грекокатолицка Харіта Пряшів пошырила свою службу на поміч біженцям з Украіны. В будинку бывшого готелю Шариш одкрыли центр підпоры. Харіта буде в ним забезпечала социяльну поміч, адміністрацийну підпору, освіту, в тым вчыня словацкого языка, ріжных активности ци гуманітарну поміч. Для біженців будут орґанізуваны і творчы варштаты, вшытко тото не лем жебы помочы потрібуючым, але жебы могли ся легше інтеґрувати. Одкрытя центра підпоры проходило при участи владыкы Петра Руснака, апостольского адміністратора Пряшівской Архієапархіі, представників Уряду Пряшівского Самосправного Краю і міста Пряшів.

Зъізд Парохіяльных Лідерів в Заменицях

Грекокатолицка Парохія Рождества св. Йоана Хрестителя в Заменицях просит жены, мужчын, родины, отців – душпастырів на Зъізд Парохіяльных Лідерів. Подія пройде в Заменицях і Хойнові 3. вересня/септембра тр. В проґрамі окрем богослужынь – конференция і варштаты, так само як і артистичый выступ. Пристуный буде і владыка Владимір Ющак. Кошт участи то 40 зл.