Голосник

Сумар дня на 24. січня/януара 2020 р.

Приносиме вам сумар медияльной ґрупы ЛЕМ.фм+ на ден 24. січня/януара 2020 р.


Музей Енді Варголя перейде переміну

Того рока зачне ся ремонт Музею Енді Варголя в Меджелабірцях. На тоту ціль власти Словациі выділили з буджети 7,1 млн евро. Візуалізацию реконструкциі представлено в минулый понедільок, 20. січня/януара, на пресконференциі в уряді Пряшівского Самосправного Краю, де присутный был дирекотр музею Мартін Цубяк. Теперішній будинок музею є вадливый і не полнит функциі модерного музею в контексті презентациі творів Енді Варголя. Плянуваный ремонт обнимат шырокій спектр робіт. Буде зроблена нова фасада, будинок буде отепленый, вымінят выгляды, двері, підлогы, част будинку буде добудувана, змінят систем електрикы і вентиляциі, выміненый буде і систем забезпечыня будинку. Ремонт музею принесе побільшыня ґалериі і маґазину, являт ся новы ательє, простір для едукацийных проґрамів і барже інтересуючых експозиций. По ремонті Музей Енді Варголя буде мал три плянтра, што даст місце на конференці, мультімедияльны презентациі, малы сценічны выступліня ци бесіды. На поді буде одпочынкова зона в формі амфітеатру. В заложынях, будинок по ремонті буде сам в собі артистичным твором. Початок ремонту плянуют на осін того рока.

Спілпраца Малопольщы та Самосправного Пряшівского Краю

Перед тыжньом стрітили ся в Старым Санчы представникы реґіональных власти Польщы і Словациі – Маршалок Малопольского Воєвідства Вітольд Козловскій та ведучый Самосправного Пряшівского Краю Мілан Маєрскій, жебы побесідувати о спільных ініциятивах Малопольщы і Пряшівского Краю. В стрічы участ взяли тіж Томаш Кашай, ґенеральный консуль Словациі в Кракові, і бургомайстер Старого Санча Яцек Лелек. На стрічы директоры департаментів Уряду Самосправного Пряшівского Краю та Маршалківского Уряду Малопольского Воєвідства зосереджали ся головні на ініциятивах звязаных з транспортом, дороговом інфраструктуром, зрівноваженым розвитком і культуром. Представлено тіж проєкт Стратеґіі Малопольщы 2030 в аспекті діянь тыкаючых приграничной обшыри та інформацию про введіня Проґраму Трансграничной Спілпрацы Інтерреґ Польща-Словация 2014-2020. Догварка о спілпрацы медже Малопольскым Воєвідством а Самосправным Пряшівскым Крайом была підписана 14. жолтня/октобра 2003 р. на замку в Старій Любовни. Єй сиґнатариями были товдышній Маршалок Малопольского Воєвідства Януш Сепіол та ведучый Самосправного Пряшівского Краю Петер Худік.

«Руты Увіты для Приятелів»

В найблизшу неділю, 26. січня/януара, в Мазярскій Загороді в Лоси пройде стріча під наголовком «Руты Увіты для Приятелів». Буде то вечер з колядами і бесідом про лемківскы і польскы різвдяны звыкы. Заколядує ґрупа Руты Увіты, але в пляні є поспівати з вшыткыма присутныма. Акомпаніювал буде Мирослав Боґонь. «Руты Увіты то ансамбль, котрым кєрує Юлия Дошна» – бесідує Марлена Пахля, членкыня ансамблю. «Співаме уж три рокы. Зосереджаме ся головні на одтворюваню старых, лемківскых пісен, котрых часто уж ани Лемкы не памятают. Базуєме на піснях записаных етноґрафами Оскаром Кольберґом та Романом Рейнфусом» – продолжат. Недільна стріча в Мазярскій Загороді зачне ся о 15.00 год.

Навчат ся іздити на лыжах

Сотка діти з ґорлицкых шкіл навчыт ся іздити на лыжах завдякы дотациі Малопольского Воєвідства «Ізджу з головом», яку отримало Місто Ґорлиці. В рамках проґраму курсу буде вчыня основ ізды, але предовшыткым вчыня безпечных звыків хоснуваня лыжных стаций та зъіздовых трас. Занятя ведены будут в 10-особовых ґрупах в часі од 27. січня/януара до 8. лютого/фебруара на схылі в Маластові. Лыжна стация в Маластові офіцийні рушыла вчера, отворена єст в годинах од 9. рано до 8. вечер. Од днес одкрыта єст і лыжна стация на Маластівскій Маґурі.

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі