Голосник

Сумар дня на 24. вересня/септембра 2020 р.

Приносиме вам сумар медияльной ґрупы ЛЕМ.фм+ на ден 24. вересня/септембра 2020 р.


Тестове списуваня населіня на Словациі

Словацка держава, подібні як більшіст европейскых держав, рыхтує ся на проведіня Повселюдного Спису, якій заплянувано на 2021 рік. Тепер мож сой спрібувати, як буде выглядало списуваня, і одповісти на звіданя в тестовым списуваню, котре выпустил Статистичный Уряд Словациі на своій стороні. Пробне списуваня має аж вісем языковых версий, в тым русиньску. Електронічный формуляр чыслит лем 13 звідянь, є міцно скороченый в порівнаню до попередніх років. Для меншын важны сут звіданя но 11 і 12. Звідуют в них о нацийональніст і материньскій язык. Звіданя 11 має іщы підзвіданя – мож зазначыти, ци чуєме ся і ґу інчій нацийональности. 13 звіданя тыкат віроісповіданя – до выбору сут вшыткы зареґіструваны церкви і реліґійных соспільности, а мож тіж зазначыти: «інче». Тестове списуваня для громадян Словацкой Республикы є доступне од 21. до 28. вересня/септембра.

Вежа в Креници Будовом Рока

Видокова вежа в Креници – конструкция, котра дає можливіст на прогульку коронами дерев в лемківскым курорті, заняла перше місце в конкурсі Будова Рока 2019. Плебісцит, котрый має уж 30-літню традицию, орґанізуют Польскій Звязок Інжынєрів i Техніків Будівництва при участи Міністерства Розвитку та Головного Уряду Будовляного Надзору. Головну нагороду вчас ґалі вручаня одобрал в Варшаві Мацєй Шыманьскій, член заряду осередка Солотвины Арена. Креницка вежа єст высока на близко 50 м, поставили єй рік тому. До вежы веде стежка долгости 1030 м. Конструкцию вознесено з акацийового дерева. Є то найвысша деревяна вежа, яку запроєктували і побудували польскы конструкторы і архітекты. З вежы видно пасмо Креницкой Яворины.

Польковиці Еко-Містом

В варшавскым Центрі Наукы Коперник вручали выріжніня 7. едициі загальнопольского конкурсу Еко-Місто. Польковиці отримали нагороду в катеґориі міст пониже 100 тис. жытелів, м.ін. за вводжыня електромобільности. Додатково Польковиці были єдиным містом, котре отримало выріжніня міністра климату за розвиток низкоемісийного транспорту. До тогорічной едициі конкуру приступило 60 самоурядів з цілой Польщы. Выріжнено шіст, в тым Польковиці. Жырі в поясніню нагороды подало, што іх увагу звернуло опрацуваня плянів ґмінной Стратеґіі Розвитку Електромобільности, промуваня зрівноваженого транспорту, зміны привычок та розвиток дармовой містной комунікациі ци можніст провіряня руху на дорогах в реальным часі. Капітула конкурсу взяла тіж до увагы урухомліня систему містного роверу повязаного з дедикуваном му аплікацийом.

Ювілей Сандецкого Етноґрафічного Парку

В надходячый вікенд Округовый Музей в Новым Санчы просит на пленерову подію пн. «Уж 45 років разом – ювілей Сандецкого Етноґрафічного Парку». Докладні в 1975 році удоступнено для туристів музей під одкрытым небом – сандецкій скансен. Згромадили гын перенесены з терену ориґінальны деревяны мешкальны і ґаздівскы будинкы, костелы, церкви і інчы обєкты малой архітектуры, характеристичны для етнічных меншын і етноґрафічных ґруп реґіону – Ляхів, Сандецкых Ґуралів, Погірян, Карпатксых Ромів і, очывидно, Лемків. В проґрамі вікендового святкуваня сут показы ремісничых выробів і народной штукы, м.ін. тесаня дерева, струганя ґонтів, колодійства, тканя ци писаня ікон. Будут варштаты печыня прозяків, адзимок, презентациі часовых выстав і стріча з народным ансамбльом пісні і танця Долина Дунайця.

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі