Сумар дня на 24. вересня/септембра 2021 р.

Приносиме вам сумар медияльной ґрупы ЛЕМ.фм+ на ден 24. вересня/септембра 2021 р.

42. засіданя Выбору про Нацийональны Меншыны і Етнічны Ґрупы

В віторок, 21. вересня/септембра тр., в Братиславі проходило 42. засіданя Выбору про Нацийональны Меншыны і Етнічны Ґрупы Рады Влады Словацкой Республикы про людскы права, нацийональны меншыны і родову рівніст. Засіданя проходило в новым складі, котрый был выбраный в липци/юлию. За русиньску нацийональну меншыну за членів были зас выбраны Петро Медвід і Мілян Ян Піліп. В засіданю нацийонального выбору історично першыраз был участный і підпредседа парляменту Ґабор Ґрендель. Підкрислил він, же много ся бесідує, же меншыны мают на Словациі добры условія, але не єст то ани здалека правдом. За словами підпредседы, покля бы так было, не был бы потрібный ани нацийональный выбор, функция омбудсмана ци дальшы орґаны, а як раз уряд омбудсмана може свідчыти, же рішат вельо проблемів тыкаючых дискримінациі меншын. Єдном з головных тем засіданя был Фонд на Підпору Культуры Нацийональных Меншын. Ситуация являт ся критичном, з 1483 підпореных ярю тр. фаховыма радами проєктів підписано лем 628, з чого лем 409 было выплаченых. Інчы темы, якы порушено на стрічы, тыкали м.ін. проблематичной новелизациі шкільного закону ци дальшых рыхтувань закону о поставліню нацийональных меншын.

Тырват збірка на консервацию церкви в Перегримці

Православна Парохія св. Тройці в Ґорлицях припоминат на своім фейсбуковым профіли о фурт тырваючій інтернетовій збірці на консервацию деревяной церкви св. Михала Архістратига в Перегримці. Роботы при консервациі престола неодолга будут завершены. Як подає на сайті колекты парох о. Роман Дубец, од парунадцетьох років місцеве лемківскє соспільство старат ся, жебы проведены были комплексовы ремонтовы працы при святыни. Каждого рока консервациі піддаваны сут части выпосажыня і розписи. В тым році повело ся позыскати од Уряду Ґміны в Осєку Ясельскым і Підкарпатского Уряду Охороны Забытків дотациі на завершыня консервациі престола в высокости 44 тис. злотых, што покрыє 60% коштів реализуваных робіт. Через сайт zrzutka.pl повело ся дотля зобрати ¼ бракуючой квоты. До ціли бракує іщы 15 тис. злотых.

VI Акция Прятаня Цмонтерів з І Світовой Войны

Війт Ґміны Санкова, Шолтыс села Ропиця Руска і председа Кружка ПТКТ нр 6 Гірского Клюбу при Столичній Коменді Поліциі в Варшаві просят до участи в VI Акциі Прятаня Цмонтерів з І Світовой Войны. Порядкуваня цмонтерів буде проходило в днях 7.-10. жолтня/октобра тр. на обшыри штырьох ґмін: Ґорлиц, Крампной, Устя Руского і Санковой. Додатково в часі робіт в Ропици Рускій зорґанізувана буде выстава Вальдемара Добровольского пн. «Ґалицийскы цмонтері – пізріня по 100 роках. Воєнны цмонтері в архівальным і теперішнім порівнаню – округ ІV – Лужна».

14. Свято Рыджыка

В вікенд 2.-3. жолтня/октобра тр. в Высовій одбуде ся 14. едиция Свята Рыджыка. В проґрамі м.ін. полюваня на Рыджыка, конкурсы, кєрмеш ремесельных выробів. Зрыхтуваный буде і едукацийный проґрам, прим. выстава «Грибы знаны і незнаны», лісовы варштаты і прогулькы, кулінарны показы. В артистичній части проґраму находят ся концерты музичных ґруп Lemko Jazz і Руты Увіты та спектакль на основі книжкы Мариі Стшелецкой «Бескід без кіту».