Сумар дня на 24. жолтня/октобра 2022 р.

Приносиме вам сумар медияльной ґрупы ЛЕМ.фм+ на ден 24. жолтня/октобра 2022 р.

Етнолоґія і культурова антрополоґія вызнаны як окрема наукова дисциплина

Розпоряджыньом Міністра Едукациі і Наукы в справі обшыри наукы і науковых дисциплин та артистичных дисциплин, «етнолоґія і культурова антрополоґія» были вызнаны як окрема наукова дисциплина. В поясніню стоіт, што пропозиция науковой дисциплины етнолоґія і культурова антрополоґія в обшыри гуманістичных наук єст одповідю на зголошуваны науковым середовиском трудности в ведіню медженародной науковой спілпрацы в рамках етнолоґіі і культуровой антрополоґіі. Брак выділеной такой дисциплины може в опініі представників той наукы спричыняти дистансуваня польскых науковців од головного нурту досліджынь веденых в тій дослідничій обшыри, в якій сут підниманы так важны проблемы сучасных перемін як міґрациі, меджекультуровы контакты, проблемы меншын ци социяльно-культуровы трансформациі.

Небезпечны одпады вывезены з Ґорлиц

В пятницю, 20. жолтня/октобра, завершыл ся послідній етап вывозу небезпечных одпадів з обшыри бывшой рафінериі Ґлімар в Ґорлицях. В справі выявленого в 2017 р. нелеґального складовиска одпадів вела поступуваня ґорлицка прокуратура. Вказало ся, што на обшыр Ґлімару звезены были м.ін. барз токсичны субстанциі, маючы орґанічны звязкы о властивостях, якы можут спричыняти раковину або збільшати ризико захворіня, як і легкопальны субстанциі. Ліквідацийом складовиска мусіло заняти ся місто. В першым етапі вывезли веце як 1800 тон, єднак вказало ся, што складовиско было векше, як початково думали. В другым, посліднім етапі вывезеных было черговых 2,5 тис. тон смітя. Фінальный кошт вывозу хімікалий вынюс близко 73,5 млн злотых. Пак небезпечны субстанциі были унешкодливлены в специяльных інсталяциях. На обшыри бывшой рафінериі дале находят ся одпады і смітя, але не сут они клясифікуваны як небезпечны.

Рушыла автобусова ленія Высова – Ґорлиці – Тарнів

По долгых місяцях жданя рушыла автобусова ленія Высова – Ґорлиці – Тарнів. Автобусы будут курсувати в обі страны двараз на ден, рано і пополудни. Внесок одкрыти ленію был зложеный Ґорлицкым Старостом до Маршалківского Уряду іщы в лютым/фебруарі минулого рока. Получыня жадали і жытелі повітів, і курортникы прібуючы ся достати до Высовой. Жебы злегшыти доізд для курортників, ленія зачынат ся і кінчыт в самым курорті. Нове получыня мало фунґувати уж од квітня/апріля тр., єднак терміну не повело ся дотримати. З автобусовой леніі Высова – Ґорлиці – Тарнів мож корыстати од минулого четверга – 20. жолтня/октобра.

Унікатовый образ Никыфора буде ліцитуваный на авкциі

Малюнок єдного з найвызначнійшых лемківскых артистів, Никыфора – Епіфана Дровняка, мож буде выліцитувати на авкциі в столичній Piękna Gallery. На авкциі, яка пройде в середу – 26. жолтня/октобра, окрем твору Никыфора будут ліцитуваны працы Маґдалены Абаканович, Генрика Стажевского ци Станіслава Фіялковского. Образ Никыфора «Монідло» має шансу отримати рекордову ціну, кєд же єст унікатом в доробку артисты. Як подала Стефанія Ольбрыхт з Piękna Gallery, «Монідло» єст єдном з найвекшых рідкости, якы ся явили в остатнім часі на рынку. Образ был намалюваный на полотні і єст більшый од типовых творів маларя. Ліцитуваный буде од порога 40 тис. злотых, але його вартіст єст рахувана аж на 120 тис. злотых.

Джерело фотоґрафіі: kultura.onet.pl