Сумар дня на 25. червця/юнія 2021 р.

Приносиме вам сумар медияльной ґрупы ЛЕМ.фм+ на ден 25. червця/юнія 2021 р.

Путуваня меджелабірскых учеників «Стежками русиньскых предків»

Русиньска Оброда на Словациі – Містна Орґанізация РОС в Меджелабірцях на тот рік зрыхтувала проєкт про учеників основных шкіл в Меджелабірцях, котры ся вчат русиньского языка, пн. «Стежками русиньскых предків». Цілю проєкту єст приближыти ученикам русиньску історию і збогатити іх проґрам вчыня. На днес єст зрыхтуване перше з путувань учеників за історийом предків до села Чертіжне. Возмут там участ в лекциі істориі, яка пройде в русиньскій ізбі, будут видіти місцеву грекокатолицку церков і цмунтір, де похоронены сут вызначны русиньскы діячы – Адольф і Віктор Добряньскы ци Юлий Ставровскій-Попрадов. Про учеників зрыхтуваны сут і короткы активности в русиньскым языку. В плянах сут уж наступны путуваня учеників, м.ін. за історийом князя Лабірця до Габуры, де діти будут видіти памятник князя і православну деревяну церков.

Стріча председы Нацийональной Рады СР з представниками Кошыцкой Грекокатолицкой Єпархіі

22. червця/юнія председа Нацийональной Рады Словацкой Республикы Борис Коллар принял в просторах парляменту представників Кошыцкой Грекокатолицкой Єпархіі – отця Войтєха Богача, сінкеля про мадярскых вірных, отця Петра Чынталу, пароха в Клокочові, і Тібора Табака, менаджера проєктів і подій Земплиньского Музею. Темом были зміцніня взаімной спілпрацы і підпора реґіональных проєктів, м.ін. проєкту будуваня Путницкого Центра в Клокочові. Борис Коллар обіцал підпору тых проєктів і єдночасно принял позваня владыкы Кірила Василя на тогорічный одпуст в Клокочові, якій пройде 15. серпня/авґуста. Выразил і пересвідчыня, же така стріча не была остатньом.

26. Фестіваль Духовной Пісні в Старій Любовни

Любовняньскій Освітній Центр, культурна інституция Пряшівскочо Самосправного Краю і Грекокатолицка Парохія в Старій Любовни просят на 26. едицию Фестівалю Духовной Пісні, якій ся одбуде уж в тоту неділю, 27. червця/юнія, о год 14.30 в екстерєрі при храмі Божой Матери Неустанной Помочы в Старій Любовни. Запрезентуют ся Хор Блаженного Мученика Домініка Трчкы при храмі Божой Матери Неустанной Помочы і монастырі редемптористів зо Старой Любовні, Православный Хор храму Успіня Пресвятой Богородиці в Орябині та співочы ґрупы і фольклорны ансамблі з Пряшова, Шаришского Ястрабя, Великого Липника, Шамброна, Литмановой, Колачкова, Плавча і Камюнкы. Фестіваль Духовной Пісні то перегляд домашніх співочых ґруп, якій єст заміреный на духовны пісні візантийского і латиньского обряду.

Призначеный новый кошыцкій єпарха

Як поінформувал Пресовый Центр Кошыцкой Єпархіі, папа римскій Франциск принял вчера, 24. червця/юнія, зречыня ся пастырского ряджыня Кошыцкой Грекокатолицкой Єпархіі передложене владыком Міляном Хаутуром, і єдночасно призначыл за кошыцкого єпарху владыку Кірила Василя. Архієпископ Кірил был дотепер апостольскым адміністратором єпархіі sede plena Кошыцкой Єпархіі. Владыці Кірилови остає осібне званя архієпископ. Як сме перше інформували, владыка Кірил лем 21. червця/юнія был папом римскым призначеный за члена Верховного Трибуналу Апостольской Сиґнатуры в Ватикані. Апостольскым адміністратором sede plena был владыка Кірил од 20. січня/януара 2020 рока.