Сумар дня на 25. квітня/апріля 2025 р.

Приносиме вам сумар медияльной ґрупы ЛЕМ.фм+ на ден 25. квітня/апріля 2025 р.

Становиско Стоваришыня «Руска Бурса» в справі будовы видоковой вежы на святій Горі Явір

Стоваришыня «Руска Бурса» в Ґорлицях выразило становиско в справі плянуваной будовы видоковой вежы на Горі Явір. Адресатом писма з 23. квітня/апріля тр. єст Директор Реґіональной Дирекциі Державных Лісів в Кракові Пьотр Кемпф. Авторы писма в імени Стоваришыня Руска Бурса выразили занепокоіня плянуваном будовом видоковой вежы і природничой стежкы на Горі Явір в Высовій. Підкрислено, што предметова локализация інвестициі тыкат місця выняткового значыня для лемківской соспільности – в реліґійным, культуровым і достоменностьовым вымірі. Гора Явір єст бо єдным з нечысленных захованых місц в польскых Карпатах, де путуют грекокатолицкы і православны вірны. В оціні Стоваришыня Руска Бурса, плянувана інвестиция, незалежно од технічного оддаліня од місця обявлінь, шкодит деликатній символичній і духовій тканці звязаній з Гором Явір, што было ясно выражене в соспільных коментарях, петициі і становиску духовенства. Однотуваный был брак реальных соспільных консультаций з представниками лемківскых середовиск, што єст незгідне з постановлінями Рады Европы. Підкрислено занепокоіня елементами едукацийных стежок, котры мали бы упамятняти барскых конкфедератів, котры в лемківскій свідомости записали ся як аґресоры. Заапелювано о зміну місця будовы вежы. Як мож чытати в становиску: «Резиґнация з реализациі інвестициі в актуальній формі была бы выразом демократичной дозрілости, стараня о спільне добро та реального зрозумліня вельокультуровости як соспільной вартости, а не лем декляративной ріжнорідности». Полный текст становиска публикуєме на нашым портали.

Маршалок Смулка одповіл на звіданя про спілпрацу з меншынами в Малопольщы

Вчера в Маршалківскым Уряді в Кракові одбыло ся пресове сніданя, зорґанізуване для представліня інвестицийных успіхів за першый рік урядуваня теперішніх власти і плянів на текучый рік. О спілпрацу Заряду Малопольского Воєвідства з нацийональныма і етнічныма меншынами звідал Маршалка Воєвідства Лукаша Смулку наш редактор Якуб Зиґмунт. Маршалок был звіданый м.ін. о тото, як докладні выглядат кооперация власти воєвідства з етнічныма і нацийональныма меншынами. “Як іде о спілпрацу з той перспективы, то не можу ся в ничым винити. Ведеме діалоґ з ріжныма середовисками, примірно в обшыри опікы над забытковыма обєктами. Вшытко зато, жебы каждый жыючый в Малопольщы чул підпору Заряду Малопольского Воєвідства. Кєд іде о новы проєкты, то меншыны тіж можут такы реализувати, беручы до увагы шыроко пониманый діалоґ.” – подал маршалок Смулка. Пало і звіданя о евентуальніст орґанізациі воєвідством ґрантового конкурсу для меншыновых орґанізаций. Як подал маршалок, на тот момент такого проєкту в Маршалківскым Уряді неє.

Беатифікация Петра Павла Ороса перенесена на дальшый термін

Дата беатифікациі нового грекокатолицкого священномученика Петра Павла Ороса буде перенесена. Поінформувало о тым вчера Правліня Мукачівской Грекокатолицкой Єпархіі. Беатифікация мала быти в селі Білкы на Підкарпатю 3. мая тр. Беатифікация не єст одкликана, лем перенесена на дальшу, тепер іщы незнану дату. Треба буде почекати на рішыня нововыбраного Папы. Як ся дознала Єпархія підчас консультаций з Колеґійом кардиналів, Святішый Отец Франциск не встиг підписати за жытя дакотрых з потрібных документів про завершальне проведіня беатифікациі, і в звязку з тым проведіня торжества беатифікациі на даным етапі стало ся неможливе. Коли єпархія отримат дальшы вісти з Ватикану, буде о них інформувала.