Сумар дня на 25. листопада/новембра 2020 р.

Приносиме вам сумар медияльной ґрупы ЛЕМ.фм+ на ден 25. листопада/новембра 2020 р.

Буде нова деревяна церков в Ґладышові

Православна парохія св. Йоана Крестителя в Ґладышові поінформувала, што зачали ся роботы звязаны з поставліньом нового храму, котрый побудуваный буде в центрі села. Нова ґладышівска церков буде припоминала неістнуючу деревяну церков свв. Космы і Даміяна з Незнайовой. Рішыня побудувати нову святыню приняте было перед парома роками. В остатніх днях зачали ся першы роботы повязаны з рыхтуваньом фундаментів. На пляци поставили і мініятурку церкви, вказуючы на красу обєкту, котрый неодолга буде зложеный з дерева. Проєкт ґладышівской святыні, на основі поміровой документациі церкви з Незнайовой, зрыхтувал консерватор памяток з Нового Санча Конрад Коханьскій, при спілпраци з Даміяном Новаком і Анджейом Жыґадлом, якы запропонували схоснувати первістны пляны незнаівского храму. Як бесідує Д. Новак, од початку концепция місцевого пароха, о. Аркадия Баранчука, была така, жебы нова церков припоминала тоту незнаівску. Кєд поведе ся зробити вшытко на час, правдоподібно на яр будучого рока церков буде зложена зо зрыхтуваного на тоту ціль дерева.

Лемковина збогатит ся о новый курорт?

Не лем сірчковы воды і ґеотермальны джерела мают быти атутом нового курорту, котрый може возникнути в ґміні Рыманів. Рудавка Рыманівска, село східньой Лемковины, уж тепер притігат туристів красным ляндшафтом і поблизкыма атракциями. Обшыр села парудесят років была тереном, на котрым проходило копаня. Одкрыли гын ґеотермальны і мінеральны джерела, основали выпочынковый осередок, котрый перешол в приватны рукы. Новы властителі зачали вести бесіды з властями ґміны в справі створіня гын курорту. Диспонуют уж вступныма баданями воды сперед парудесятьох років, будут роблены тіж і дальшы. На обшыри ділянкы осередка є ґеотермальне верчыня глубокости коло 800 м, вода гын має 40 градусів. Така температура старчат до хоснуваня єй в бальнеолоґічным лікуваню ци інгаляциях. Курорт міг бы быти одданый до хоснуваня протягом 3-4 років, найважнійше то побудувати природолікуючый заклад і пияльню. Треба буде тіж провести досліджыня климату, природолікуючых засобів і галасу, што є конечне до зрыхтуваня курортного операту, котрый складат ся до Міністерства Здоровля, і на основі котрого міністер выдає рішыня о сполніню вымогів до утворіня курортной місцевости.

Хоц роботы іщы тырвают, Климківка притігат

Заґаздовуваня берегів озера в Климківці фурт тырват. О кілько част інвестиций ґміны Ропа є уж близко завершыня, остали лем выкінчыньовы дрібниці, о тепер ціла увага зосереджена є на части реализуваній через ґорлицкє староство. Траса од станиці до Сонечной Пристани є уж вызначена, положены сут бордюры, высыпаный дрібный камін. Вельо люди уж гын спацерує, хоц остало іщы кус робіт до закінчыня інвестициі. Корыстают єднак з в міру сприятливой хвилі і активні выпочывают цілыма родинами.

Выстава фотоґрафій польско-словацкого погранича

Водопады, рікы, потокы, Климківка згоры, пят веж на Ротунді, ґеолоґічны явиска – то лем част того, што мож видіти на выставі фотоґрафіі польско-словацкого погранича, презентуваній іщы лем до 30. листопада/новембра в Центрі Туристичного і Культурового Продукуту Ґорлицкого Бескіду в Высовій. Выстава завандрує пак до сусіднього Бардийова.