Голосник

Сумар дня на 25. лютого/фебруара 2020 р.

Приносиме вам сумар медияльной ґрупы ЛЕМ.фм+ на ден 25. лютого/фебруара 2020 р.


Наступна едиция нагоды ім. Марияна Корнецкого

До 20. марця мож зголошувати кандидатів до нагоды ім. Марияна Корнецкого, котра єст признавана Малопольскым Воєвідством для осіб, якы мают вклад в охорону памяток деревяной архітектуры. Зголошыня до преміі можут давати м.ін. капітула нагороды, окремы інституциі, стоваришыня, орґанізациі, університеты ци самоурядовы єдиниці. Переможця отримує фінансову нагороду в высокости 15 тис. зл. Нагороду передає ся нп. за опіку над деревяныма обєктами ци властиве іх хоснуваня. Капітула зверат увагу і на дальшы критериі – узнаны можут быти консерваторскы, реновацийны або будівляны роботы, ведены над забытками, іх досліджаня і документация, а тіж промоцийны діяня. Лавреат буде оголошеный в маю протягом тогорічной едициі Малопольскых Дни Нацийональной Спадковины. В маю 2019 р. оцініня за опіку над храмом св. Параскєвы в Квятони отримал Ян Гыра, долголітній провідник по тій церкви і єй популяризатор.

Музей Никыфора в Креници в новій версиі

По близко річній перерві Музей Никыфора в Креници зас єст одкрытый. Памяткова «Романівка» по 25 роках істнуваня музею дождала ся комплексового ремонту. Кошт цілой інвестициі то праві 900 тис. зл, з чого аж 70% фінансувала Европейска Унія. Офіцияльне одкрытя музею одбыло ся 21. лютого/фебруара. З той нагоды в «Романівці» присутны были Маршалок Малопольского Воєвідства Вітольд Козловскій, директор Округового Музею в Новым Санчы Роберт Слюсарек і представник Европейской Комісиі в Польщы Філіп Скавіньскій. На торжественным одкрытю запрезентувал ся тіж ансамбль Руты Увіты разом з Юлийом Дошном і Петро Трохановскій в концерті лемківскых пісен. Ремонт музею тыкал ся термомодернізациі, вымінено гріючу і водну інсталяцию та зроблено будинок барже доступным для непелносправных. В середині нашли ся м.ін. новы інформацийны таблиці в не лем польскым і анґлицкым языках, але і єдна, о Никыфорі, по лемківскы. Додатково сут штырі дотыковы екраны, жебы самому переглядати материялы на тему артисты. На ново была і зааранжувана стала експозиция з творами Никыфора, де находит ся більше як 70 його робіт. На тоту хвилю на часовій выставі тіж находят ся творы Никыфора. Можна там видіти такы роботы як «Уздоровліня хворой» ци «Молитовник».

“Порожній ліс” нагородженый в преміі «Портреты»

Моніка Шнайдерман єст першом лавреатком нагороды «Портреты», яку передає місячник «Краків». Вшытко завдякы єй найновшій книжці «Порожній ліс», што была оголошена в послідню суботу найліпшом біоґрафічном публикацийом 2019 рока. Серед номінуваных до преміі было 20 осіб, котры влони в найбарже інтересуючый і докладный спосіб вказували культуру, природу, середовиско і люди. До фіналу окрем Монікы Шнайдерман достали ся Мацєй Пєпщыця і Рафал Сискій. Нагороджена книжка жытелькы Низкого Бескіду оповідат о селі Воловец, што ся находит в ґміні Санкова, колиси рахувало оно близко 800 мешканців і была то мішанина Лемків, Жыдів і Циґанів. По масовых выіздах за океан в місцевости остала ся уж лем жменя люди. Як пише сама авторка – «Жыючы, занимаме місце тых, котры были перед нами, такій єст порядок. Як єднак жыти в місци, в котрым жменя люди занимат місце по вісемстох? Особливо як тых вістемстох не одышло так, як наказує час, лем змела іх істория?».

Наступный нижовый вір зас шдкодыл

В цілій Малопольщы зас были сильны вітры, тым разом был то нижовый вір Юлия. І хоцкі был він легшый як тот попередній – Сабріна, то тіж наробил великой шкоды. В ночы з 23. на 24. лютого/фебруара пожарникы провели більше як 300 інтервенций. Вітер дул аж і зо скорістю до 80-ох кілометрів на годину. Найгірше было в новоторжскым, лимановскым, новосандецкым і тарнівскым повітах. Вітер поламал голузи, аж і повалил цілы дерева. Ушкодил тіж дахы, а в парох ґмінах спричынил перервы в електриці і опізніня потягів. Не єст то єднак конец, бо в сторону Польщы іде дальшый ниж Зегна.

Шеруй.

О авторі

Avatar

Коментарі