Голосник

Сумар дня на 25. марця 2020 р.

Приносиме вам сумар медияльной ґрупы ЛЕМ.фм+ на ден 25. марця 2020 р.


Злегшыня для бенефіциєнтів дофінансувань з Евросоюзу

Коронавірус має влияня не лем на наше здоровля, тіж на економіку. Самоуряд Малопольского Воєвіства робит крок наперед і пропонує поміч малопольскым підприємцям, котры хоснуют унійны середкы. Зрыхтувал він специяльный антикризисовый пакєт. Опрацуваны діяня і злегшыня мают змінімалізувати тяжку ситуяцию бенефіциєнтів дофінансувань з Евросоюзу. В приспішеній процедурі малопольскій самоуряд выплачат без фактур задаткы, выдолжыл терміны складаня дополнінь, так само выдолжыл період реалізациі проєктів – коли є така потреба, ци змінил реґулямін конкурсів, жебы дати можливіст малопольскым фірмам підписати умовы в пізнійшым терміні. То лем част зо списку злегшынь. Вшыткы фірмы, котры мают уж даякы трудности в реалізациі проєктів, звязаны з понесеныма коштами в контексті напр. одкликаных конференций, анулюваных резерваций і інчых, прошены сут контактувати ся безпоседеньо з Малопольскым Центром Підприємства.

Выремонтуют дорогу Ґорлиці-Новый Змигород-Дукля

Міністерство Фондів і Реґіональной Політикы та Підкарпатскє Воєвідство підписали догваріня о дофінансуваня проєкту «Модернізация комунікацийных получынь в реґіоні Свидник, Стропків і Ясло». В рамках інвестициі по польскій страні буде выремонтуваный фраґмент воєвідской дорогы но 993 Ґорлиці-Новый Змигород-Дукля на долгости кус більше як 7 км. Задача є продолжыньом модернізациі той дорогы започаткуваной минулого рока через будову новых мостів в Клопітници і Перегримці. По словацкій страні выремонтуют част пути на дорозі II/556 медже селами Фіяш-Ломне. Цілый проєкт возник як спільна ініциятива Підкарпатского Воєвідства і Пряшівского Краю. Аналоґіный проєкт, в рамках проґраму Інтерреґ, реалізує на своім одтинку дорогу 993 Малопольскє Воєвідство. 18. марця тр. был оголошеный конкурс на модернізацию одтинків дорогы 993 на трасі Ґорлиці-Липинкы.

Стриманя гандлю медже Лемковином а Пряшівском Русю

В звязку з закрытьом границ спричыненым пошырюваньом ся коронавіруса і граничный перехід медже лемківскым Лелюховом а русиньскым Чырчом заперли 15. марця тр. Стережут го Гранична Служба і войско, а приграничный гандель єст стриманый. Жытелі Чырча робили в тым особливым приграничным гандльовым центрі штоденні закупы. Розвиваючы ся гын інтересы то джерело утриманя вельох осіб – покля што застопуваны. Ожывліня гандльовой выміны зачало ся од одкрытя Вышеградского Мосту 6. вересня/септембра 2003 рока, пак входу Польщы і Словациі до Евросоюзу в 2004 році, а головні од приступліня до укладу Шенґен, якій зносит границі внутрі Европейской Уніі, котре прошло 21. грудня/децембра 2007 рока. В короткым часі на граници вытворил ся гандльовый центр. На ярмаку штоденны меншы закупы робили жытелі русиньского Чырча, а по більшы приізджали аж і жытелі сел оддаленых о вельо кілометрів. Товары, якы мож гын достати, то головні ідло, але мож купити властиві вшытко – черевікы, облечыня, промысловы річы, выробы з дерева, господарскы выробы, є аж і моторизацийный склеп.

Митрополита Словациі Йоан Бабяк дал ґаранцию новій владі про духову підпору

29. лютого/фебруара выбрано на Словациі нову владу. В сувоту, 21. марця, президентка Словацкой Республикы Зузана Чапутова выменувала новый ґабінет, котрый веде премєр Ігор Матович. Грекокатолицкій архієпископ пряшівскій, митрополита Словациі Йоан Бабяк в писмі з 22. марця ґратулювал новій владі та дал ґарантию о духовній помочы Грекокатолицкой Церкви на Словациі. Цілу владу дал під покров Пресвятой Богородиці – Сімстрастной Дівы Мариі, котра є покровительком Словациі. На тот момент вшыткы богослужыня проходят за закрытыма дверми. Найпізнійше під заряджыня бывшого премєра Петра Пеллеґріні підпорядкувала ся Православна Церков на Словациі. Заказ обовязує до кінця марця, а римокатолицка єрархія уж припустила, што без публичных богослужынь буде того рока проходил може і Великден. Вельо церкви забезечат высыланя богослужынь онляйн і апелює до вірных, жебы ся духово спаяли через тоты высыланя зо своіма священниками і єпископами.

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі