Сумар дня на 25. марця 2021 р.

Приносиме вам сумар медияльной ґрупы ЛЕМ.фм+ на ден 25. марця 2021 р.

Найблизше Загальне Зобраня членів Руской Бурсы одкликане

На найблизшу суботу заплянуване было Загальне Зобраня членів Стоваришыня «Руска Бурса» в Ґорлицях. В звязку посліднім збільшыньом ся чысла хворых на коронавіруса заряд Стоваришыня рішыл вчера одкликати згромаджыня. Покля што плянує ся, же зобраня одбуде ся до кінця червця/юнія текучого рока. Члены Руской Бурсы сут з цілой Польщы – так з Лемковины, як і західніх земель, але тіж з інчых центральных міст, зато тіж ризико заражыня є більше. Припоминаме, што єдном зо статутовых задач шторічного Загального Зобраня членів Стоваришыня «Руска Бурса» в Ґорлицях єст выбрати новы власти – ведучого і членів заряду, приняти справописы з діяльности та приняти стратеґіі діяня і розвитку на дальшый рік. Влони, в звязку з початком пандеміі, зобраня тіж не одбыло ся о традицийным часі в марци, а было неренесене на конец червця/юнія.

50 років ансамблю «Горнад»

В найблизшу неділю, 28. марця, одбуде ся онляйн премєра звязана зо святкуваньом 50. річниці выникнутя Фольклорного Ансамблю «Горнад» з Кошыц. Подія зачне ся о 18.00 год. трансмісийом на фейсбуковым фанпейджы ансамблю. Проґрам буде зреализуваный в режысериі Мариянны Свореновой. В заповіди концерту чытати можеме, што выступы выполнены будут міцныма емоциями, танцювальныма, співочыма і музичныма іднивідуальностями. Ансамбль, в звязку з нелегкыма часами для творців культуры, звертат ся до любителів про добровільны даткы на іх діяльніст. Переказувати іх мож на банковый рахунок презентуваный на сайті колективу. Ансамбль Горнад был основаный в 1971 р. Є то словацкій колектив, якій заєдно часто одкликує ся на русиньскы традициі. В його репертуарі мож стрітити нашы танці і музику. Ґрупа перед парома роками выступила з танцювально-музичныма темами «Оптациі» (реализуваный тіж з ФА «Рутенія») і «Справы, што ся діют». Оба проґрамы были посвячены русиньскым темам.

Голосуйте на нашы платні в «Віртуальных Гушлях»

До кінця квітня/апріля можете голосувати на найліпшу фолькову платню 2020 рока, яка вказала ся на польскым музичным рынку. Серед парудесятьох пропозиций не бракує і такых, котры базуют на лемківскым фольклорі. Голосувати мож і на выдавництво Руской Бурсы – модерну платню «HULATY». Конкурс «Віртуальны Гушлі» то плебісцит, якій орґанізуваный є од 2003 рока. «HULATY» то десят модерных творів інспіруваных традицийныма лемківскыма піснями. Реміксы зреализувал Шымон Пьотровскій (t dot est) – польскій перкусиста, продуцент, реализатор звуку. Творіня електронічной музикы то дальша обшыр, в котрій успішні ся реализує. До спілпрацы запрошено выдатных творців музикы: Сусанну Яру і Сестры Бочнєвич. В дальшых пропозициях, в котрых дослухати мож ся лемківского языка і нашых мелодий, є платня од Камерального Хору Бельферсінґерс з Ґорлиц. Тот взял на варштат лемківскы і погіряньскы народны співанкы. На платни нашли ся такы лемківскы еверґріны як «Тиха вода», «Горы моі», «Гора, гора», «Іванку», «Дружба я си», «Кєд єм ішол» ци «Ганцю не дримай». Номінацию мают тіж дві платні ЛАПіТ «Кычера». То альбомы пн. «Лемковино – краю рідный» і «Засвіт мі сонечко», яка награна была через дітячу Кычерку. Заохочаме оддавати голосы.

Тяжка ситуация і на Словациі

З тяжком пандемічом ситуацийом борют ся нашы полудньовы сусіды – Словакы, а вєдно з тым громадяне той державы – Русины. Шпыталь з поліклініком ім. Раймана в Пряшові збільшыл в остатніх днях чысло постели для пациєнтів хворых на коронавіруса. Тепер іх є 201, значыт 22 веце як в послідніх днях. До вчера было занятых ковідовых місц в шпытали на 74%. На ковідовым одділі є госпітализуваных 123 пациєнтів, з них 116 є позитивных і семеро суспектні. Штырнадцет позитивных тестуваных пациентів є госпітализуваных на одділі анестезийолоґіі і інтенсивной терапіі і вшыткы сут під респіраторами. На ковідовым одділі ґериятриі є 12 позитивных тестуваных пациєнтів. Припоминаме, што пациєнты з Пряшова госпітализуваны сут м.ін. в ґорлицкым шпытяли, в звязку з акцийом помочы польской державы Словакам, де сутиация в борбі з вірусом дотля была на вельо гірша.